Obligaziun da laschar registrar giaglinom; scumond da far exposiziuns da giaglinom ed occurrenzas sumegliantas; scumond da tegnair giaglinom al liber.

Per realisar il pachet da mesiras dal cussegl federal cunter la grippa d'utschels pon las annunzias per laschar registrar ils effectivs da giaglinom en il chantun Grischun vegnir fatgas tar l'uffizi per la segirezza da victualias e per la sanadad d'animals. Las proprietarias ed ils proprietaris da giaglinom pon far questas annunzias tant per telefon (081 257 24 14) sco er sin via electronica (info@alt.gr.ch u sur la pagina d'internet www.alt.gr.ch).

Il venderdi, ils 21 d'october 2005, ha il cussegl federal relaschà in pachet da mesiras per prevegnir supplementarmain a l'import da la grippa d'utschels en Svizra. A partir dals 25 d'october 2005 fin ils 15 da december 2005 èsi scumandà da tegnair al liber giaglinom, utschels nudaders ed utschels curriders. Exposiziuns e martgads da giaglinom ed occurrenzas sumegliantas èn scumandadas.

Ultra da quai èn tut las persunas che possedan tals animals obligadas d'annunziar tals fin ils 2 da november 2005. Exceptads da questa obligaziun da registraziun èn proprietarias e proprietaris da giaglinom che han gia annunzià lur effectiv da giaglinom en il rom da la dumbraziun dals animals 2005.

L'uffizi per la segirezza da victualias e per la sanadad d'animals (USVA), servetsch veterinar, è cumpetent per retschaiver las annunzias da registraziun che vegnan fatgas da las proprietarias e dals proprietaris da giaglinom. Las annunzias pon vegnir fatgas per telefon (081 257 24 14) sco er sin via electronica per mail (info@alt.gr.ch) u cun il formular da contact sin la pagina d'internet dal USVA (www.alt.gr.ch; rubrica "Contact", "d"). Las proprietarias ed ils proprietaris da giaglinom ston inditgar l'adressa, il gener da la tratga da giaglinom, la spezia da giaglina ed il dumber dals animals che vegnan tratgs.
Gremi:
Funtauna: rg