En il Grischun èsi planisà da stabilir in center da geodatas cun la participaziun dal chantun. La finamira dal project è da meglierar considerablamain la valur agiuntada da la resursa "geodatas", ina resursa per part anc nunutilisada. Geodatas èn datas cun infurmaziuns che sa refereschan al territori e che sa basan sin coordinatas. Per che las datas nunutilisadas vegnian er tratgas a niz, èsi - tenor la valitaziun da la regenza - necessari da porscher las datas da basa da la mesiraziun uffiziala uschè favuraivel sco pussaivel. Concretamain ston vegnir reducidas las taxas d'extracts e d'evaluaziuns da la mesiraziun uffiziala e vegnir stgaffidas bunas cundiziuns per la clientella gronda. Quests projects pon vegnir realisads tras ina revisiun totala da l'ordinaziun davart las taxas per retrair extracts e valitaziuns da la mesiraziun uffiziala. La regenza ha prendì enconuschientscha dal sboz per ina tala revisiun totala e l'ha deliberà per la consultaziun.

La lescha davart la scola auta da pedagogia e la lescha davart la scola auta da tecnica ed economia entran en vigur
La revisiun totala da la lescha davart la scola auta professiunala da pedagogia (nov titel: lescha davart la scola auta da pedagogia, LSAP) vegn messa en vigur per il 1. da schaner 2006. Il termin da referendum da 90 dis è scadì ils 23 da mars 2005 senza esser vegnì duvrà. Er la lescha davart la scola auta da tecnica ed economia (LSATE) vegn messa en vigur per il 1. da schaner 2006, suenter ch'il termin da referendum è scadi senza esser vegnì duvrà.

Da vischnancas e regiuns
- Farera: Tenor l'expertisa rectifitgada vegn fixada la sveltezza maximala entaifer il vitg a 30 km/h ed i vegn introducida ina zona da tempo 30.
- Glion: La regenza approvescha la construcziun d'ina nova senda resp. via da velos sco colliaziun tranter Glion e Strada sin il territori da la citad da Glion. Per ils custs per construir l'ovra d'ina lunghezza da ca. 70 meters vegn concedida ina contribuziun chantunala maximala da 33'000 francs.
- Tujetsch: Sin la via sursilvana, sin ina lunghezza da ca. 470 meters entaifer la fracziun da Dieni, vegn reducida la sveltezza maximala dad 80 a 60 km/h. A medem temp vegn quest traject signalisà sco sectur entaifer il vitg.
- S-chanf: La revisiun parziala da la planisaziun locala "plan da zonas 1:1000 Cinuos-chel/Grischuns" vegn approvada.
- Sutsassiala: La regenza approvescha il plan per il svilup dal guaud da Sutsassiala per las vischnancas da Breil, da Schlans, da Sumvitg e da Trun.

Contribuziuns chantunalas a differentas instituziuns
- Societad da musica da Zizers: A la societad da musica da Zizers vegn concedida ina contribuziun maximala da 13'000 francs per ina instrumentaziun parziala.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun