Sche persunas basegnusas cumprovan per exempel tras lavur d'utilitad publica ch'ellas vulan puspè s'integrar en il process da lavur, vegnan ellas remuneradas. En l'avegnir survegnan ellas dapli agid social che quellas persunas che na fan nagins sforzs correspundents. Quai è il punct central dal relasch da las disposiziuns executivas tar la lescha davart il sustegn da persunas basegnusas che la regenza grischuna ha approvà dacurt. Quest relasch sa basa en emprima lingia sin las directivas per la concepziun e per la calculaziun da l'agid social, las qualas èn vegnidas revedidas l'ultima giada l'avrigl 2005 da la conferenza svizra da l'agid social (COSAS). La revisiun è succedida cunzunt sut il squitsch dals chantuns che vegnan confruntads cun adina dapli cas e cun adina damain resursas. La regenza parta dal fatg che las expensas dal chantun e da las vischnancas per prestaziuns da sustegn restian circa medem grondas, e quai malgrà las novas regulaziuns. En connex cun quest relasch èsi impurtant per ella che las schanzas da las persunas pertutgadas d'avair access al martgà da lavur e da sortir da l'agid social s'augmentian.

La lescha davart las stimaziuns uffizialas va en consultaziun
La regenza ha dà en consultaziun la lescha davart las stimaziuns uffizialas. En quest connex sa tracti d'ina nova lescha sin basa da la nova constituziun dal chantun Grischun. Tenor quella sto il cussegl grond relaschar tut las disposiziuns impurtantas en furma d'ina lescha. Sin fundament dal transferiment stringent da las disposiziuns da stimaziun en in stgalim da relasch pli aut, è il sboz da la lescha qua avant maun - cumpareglià cun l'ordinaziun vertenta e cumprovada en la pratica - vegnì midà principalmain areguard la furma. Tuttina han ins - cun relaschar ina nova lescha - prendì la chaschun da far er singulas adattaziuns materialas.

La regenza prenda posiziun davart il plan secturial da traffic da la confederaziun
Il sectur "vias" dal plan secturial da traffic ch'è vegnì suttamess dal departament federal per ambient, traffic, energia e communicaziun (DATEC) als chantuns per prender posiziun, ha -tenor l'opiniun da la regenza grischuna - tschertas mancanzas. Uschia èn ils criteris elegids en connex cun la rait da basa vegnids applitgads a disfavur dal chantun Grischun. Cunzunt las axas Castasegna - Martina, Vereina - pass dal Fuorn - Müstair sco er Brig - Andermatt - La Punt ston, tenor la regenza, vegnir attribuidas stringentamain a la rait da basa. Ultra da quai propona la regenza tschertas cumplettaziuns en il sectur da la viafier, tranter auter meglras colliaziuns sur ils cunfins vers l'Austria e vers la Germania dal sid sco er la promoziun da colliaziuns senza stuair midar il med da transport tranter l'eroport da Turitg ed il Grischun. Senza las cumplettaziuns pretendidas manca tenor la regenza grischuna ina concordanza cun il plan directiv chantunal tenor l'art. 20 da l'ordinaziun davart la planisaziun dal territori. Correspundentamain na vegnan er las pretensiuns legalas betg ademplidas.

Da vischnancas e regiuns
- Maiavilla-Malans: La regenza approvescha il plan dals cunfins communals tranter Maiavilla e Malans.
- Schiers, Grüsch, Seewis, Igis, Malans e Maiavilla: La regenza approvescha il project ch'è avant maun per revitalisar la Landquart. Ella conceda - cun resalva da la garanzia da subvenziun tras la confederaziun - ina contribuziun chantunala da totalmain 1'784'000 francs. Ultra da quai surpiglia il chantun ils custs restants en l'autezza da 170'000 francs per il passagi da peschs tar la serrada da la Clus.
- Corporaziun regiunala pro Partenz: La cumplettaziun dal plan directiv regiunal "deponia da substanzas inertas e da material, Val da Schaniela" sin il territori communal da Luzein vegn approvada. Ultra da quai approvescha la regenza la cuntinuaziun dal plan directiv regiunal "7.602, deponias da material".
- Sagogn: Il plan "midadas dal plan da zonas 1:500 parcella nr. 6" vegn approvà en il senn da las ponderaziuns.
- Vella: La regenza garantescha a la vischnanca da Vella ina contribuziun chantunala da maximalmain 20'480 francs als custs supplementars da la via da colliaziun Cuschias.

Contribuziuns chantunalas a differentas instituziuns
- Uniun leger.GR: Per organisar e per realisar il 4. premi da lecturas e da lecturs da la ARGE ALP en il chantun Grischun survegn l'uniun leger.GR in sustegn unic en l'autezza da maximalmain 19'400 francs.
- Almanacco Mesolcina-Calanca: L'ediziun dal "almanacco Mesolcina-Calanca" vegn sustegnida da la regenza cun ina contribuziun da 6'000 francs.

Persunal
- Ludwig Locher, directur da la Ems-Chemie SA, è vegnì elegì sco president dal cussegl da la scola auta da tecnica ed economia (SATE) a Cuira. Ulteriuras commembras ed ulteriurs commembers dal cussegl da la scola auta èn Guglielmo Brentel, Marianne Manzanell, Hans Peter Märchy, Hanspeter Lebrument, Alois Vinzens ed Andreas Wieland.
- Martin Jäger, commember dal cussegl da la citad da Cuira, è vegnì elegì sco president dal cussegl da la scola auta da pedagogia a Cuira. Ulteriuras commembras ed ulteriurs commembers èn Hans Peter Märchy, Rolf Hanimann, Walter Hohl, Ladina Maissen, Jacqueline Stgier e Livio Zanolari.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun