- Braggio e Buseno: La regenza approvescha il plan da cunfin da las
vischnancas da Braggio e da Buseno.
- "Corporaziun da scola Rueun e conturn": La regenza approvescha il
statut d'organisaziun da la "corporaziun da scola Rueun e conturn". Da
la "corporaziun fan part las vischnancas da Rueun, d'Andiast, da Pigniu,
da Siat e da Vuorz.
Contribuziuns chantunalas a differentas instituziuns
- Reparaziun da donns da malaura: Las auas grondas da l'avust passà
cun inundaziuns e bovas han chaschunà gronds donns en diversas parts dal
Grischun. La summa totala dals donns chaschunads da las malauras vi dals
implants da l'infrastructura agricula e vi dal terren cultivà da gronda
valur vegn stimà a var 10'300'000 francs. Sa basond sin la legislaziun
da meglieraziun vegni spetgà che la confederaziun concedia contribuziuns
extraordinarias a quests custs en l'autezza da 60 pertschient, quai che
correspunda a circa 6'200'000 francs. La tariffa da contribuziun da la
confederaziun sa cumpona d'ina contribuziun da basa da 36 pertschient,
d'in supplement da maximalmain 10 pertschient per la chargia finanziala
che dependa da la forza finanziala da la vischnanca e d'ina contribuziun
speziala da 20 pervi d'eveniments da la natira extraordinaris. La
cuntraprestaziun ch'il chantun sto surpigliar vegn mo pretendida sin la
contribuziun da basa ed importa 2'636'800 francs. La regenza
deliberescha pia ina contribuziun chantunala da 2'636'800 francs per
reparar ils donns da las malauras vi dals implants da l'infrastructura
agricula e vi dal terren cultivà da gronda valur.
- GrischaVision SA: Per construir la rait da communicaziun ad Arosa
garantescha il chantun a la GrischaVision SA, Cuira, in credit d'agid
d'investiziun senza tschains da la confederaziun dad 1'000'000 francs
cun ina durada da diesch onns. En il senn da la lescha federala davart
agids d'investiziun per territoris da muntogna surpiglia il chantun
maximalmain 168'339 francs da quai.
- Casa Depuoz Trun: Per sanar il bogn cuvert da la casa Depuoz a
Trun vegn concedì ina contribuziun da construcziun da 386'400 francs sin
basa da la lescha davart la promoziun da persunas cun impediments. Quai
correspunda ad 80 pertschient dals custs imputabels.
- Claustra Son Jon, Müstair: Als custs cun dretg da subvenziun da la
nova cuvrida dal tetg per la claustra da Son Jon a Müstair garantescha
la regenza ina contribuziun chantunala da maximalmain 84'300 francs.
Projects da vias
La regenza ha approvà totalmain 2'929'000 francs per construir e per
sanar divers trajects da via:
- sviament da Saas: lavurs d'impressari sin la A28 tranter Landquart
e Claustra/Selfranga
- via dal Güglia: correcziun da la via a Tinizong en il vitg
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun