Tenor il concept da la confederaziun duain las plazzas d'armas e da tir en il Grischun vegnir utilisadas vinavant. Per part è er planisà in augment da l'occupaziun. Il medem mument prevesa il concept da staziunament però d'endrizzar ils centers d'infrastructura e da logistica lunsch davent dal Grischun. L'arsenal da Cuira cun ses lavuratoris e cun il manaschi da garascha duai facticamain vegnir abolì. Cun quai n'è la regenza dentant betg perencletga. L'economisaziun da material e l'infrastructura per mantegnair, reparar e remplazzar utensils, vehichels ed equipament duain esser uschè damanaivlas sco pussaivel al lieu d'acziun. Mo uschia sa laschia garantir in'acziun sperta e senza incaps da las truppas e dal material e sa laschian reducir transports che custan temp e transfers nunproductivs, scriva la regenza en sia posiziun al departament federal da defensiun, protecziun da la populaziun e sport (DDPS).

La regenza grischuna dubitescha che quest concept tegnia propi pitg a ponderaziuns da l'economia da manaschi - sco ch'il DDPS ha punctuà diversas giadas; ed ella crititgescha che las calculaziuns da model da l'economia da manaschi davart il nov concept da staziunament da l'armada na sajan mai stattas a disposiziun als chantuns.

Il Grischun posseda senza dubi diversas plazzas d'armas e da tir fitg adattadas che vegnan er utilisadas vinavant. Correspundentamain han ins pudì spetgar che l'infrastructura e la logistica correspudenta restia en noss chantun. La regenza propona perquai, ch'il Grischun survegnia in center d'infrastructura u che almain sia direcziun cun ina part dal center vegnia domicilià en il Grischun.

Il chantun Grischun ha stuì acceptar ils ultims onns ina perdita sproporziunala da plazzas da lavur en l'armada. Dapi l'onn 1995 èn idas a perder 77 plazzas da lavur; ussa duain vegnir reducidas oravant tut a Cuira ulteriuras 60 plazzas. La regenza spetga er en quest reguard in'examinaziun dal concept da staziunament. Per l'acceptanza da plazzas da tir èsi impurtant ch'er in dumber da plazzas da lavur colliadas cun quellas saja avant maun al lieu.

Post da polizia a San Murezzan: cumpra da las localitads
La regenza propona al cussegl grond da cumprar las localitads da la polizia chantunala grischuna vi da la via Grevas a San Murezzan. Ella ha deliberà la missiva correspundenta. Pretsch: 3.1 milliuns francs. La cumpra dal plaun è objectivamain raschunaivla e finanzialmain interessanta. Uschia sa laschan spargnar - fin tar la perioda da locaziun ch'è vegnida fixada oriundamain fin l'onn 2023 - circa 25'000 fracs per onn ed alura passa 40'000 francs per onn. Il cussegl grond vegn a tractar la missiva il zercladur u l'avust. Il conclus da credit è suttamess al referendum facultativ.

Dapi l'onn 2003 è il post da polizia da San Murezza domicilià a la via Grevas. Actualmain fan diesch polizistas e polizists lur servetsch en quel vitg da l'Engiadin'auta. En cas d'occurrenzas spezialas pon vegnir endrizzadas fin 16 plazzas da lavur. Per futurs basegns da spazi èn schizunt avant maun reservas adequatas. La situaziun dal post da polizia è plinavant ideala.

Gea als examens da maturitad a la scola svizra a Milaun
La regenza grischuna renconuscha ils attestats da maturitad da la scola svizra a Milaun. Il medem mument propona ella che er la cumissiun svizra da maturitad renconuschia quels attestats. Uschia pon las maturandas ed ils maturands far lur examens a Milaun e na ston betg pli vegnir a Cuira per quai.

Uffizi da fatgs da polizia e da dretg civil: Las leschas adattadas èn vegnidas messas en vigur
Ils 26 da schaner è scadì il termin da referendum per la revisiun parziala da la lescha introductiva tar il cudesch civil svizzer, per la lescha introductiva tar il dretg d'obligaziuns svizzer e per la lescha davart la prevenziun professiunala senza ch'i saja vegnì profità d'el; la regenza ha ussa mess en vigur quests trais relaschs retroactivamain per il 1. da schaner 2005. Il medem mument èn vegnidas abolidas trais ordinaziuns: l'ordinaziun executiva davart il stadi civil, l'ordinaziun executiva tar il dretg d'obligaziuns svizzer e l'ordinaziun executiva davart la prevenziun professiunala.

Questas adattaziuns èn stadas necessarias, perquai che l'uffizi da polizia e l'uffizi da dretg civil èn vegnids unids per il 1. da schaner 2005.

Da vischnancas e regiuns
- Cuira, Grono: La regenza ha approvà la constituziun da la citad revedida e la nova constituziun communala.
- Sour: Per ils rempars da l'Ava dallas Cuorts ha la regenza approvà ina contribuziun chantunala da 240'000 francs. Suenter las malauras dal november 2002 è il privel d'inundaziuns acut.

Chaussas persunalas
- Roger Danuser, Cuira, fin ussa schef da la secziun "human resources" en l'uffizi da persunal e d'organisaziun, è vegnì elegì sco manader da la partiziun "cussegliaziun e svilup dal persunal".

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun