Navigation

Inhaltsbereich

  • Erste Mitteilung
  • Neuen Beitrag einfügen
A partir dad oz stat a disposiziun a tut las persunas che s'interessan per la cultura in nov servetsch gratuit: La plattafurma d'internet grischunCULTURA infurmescha en moda cumplessiva davart persunas che lavuran sin il champ cultural e davart organisaziuns ed occurrenzas culturalas da tut las spartas en il Grischun e dal Grischun.

Tras la plattafurma d'internet grischunCULTURA duai vegnir rendì enconuschent tut il spectrum multifar da la cultura - emnas da festa, festivals, openairs, represchentaziuns da musica e da teater sco er la cultura architectonica singulara ed ils museums - ed esser accessibel per persunas indigenas sco per giasts da vacanzas en furma simpla e concisa, sco en in "cudesch da telefon da branschas" cun commentari. Per bleras persunas che lavuran sco artistas ed artists, sco musicistas e musicists e sco teatristas e teatrists èsi zunt impurtant da sa preschentar permanentamain er ordaifer las exposiziuns e las represchentaziuns: Sin grischunCULTURA pon ellas ed els far quai.

Las infurmaziuns derivan directamain da las persunas che lavuran sin il champ cultural sco er da las organisaturas e dals organisaturs che pon endatar lur infurmaziuns davent da l'agen computer en la banca da datas. Per concepir e per realisar grischunCULTURA è vegnì collavurà stretgamain cun Grischun vacanzas. Uschia è grischunCULTURA integrà en il portal grischun "www.graubuenden.ch". A partir da la primavaira proxima duain las datas da las occurrenzas vegnir colliadas uschia, che mintga occurrenza sto vegnir endatada - sche pussaivel - mo ina giada en in lieu. Per pudair trair a niz uschè bleras sinergias sco pussaivel è grischunCULTURA vegnì realisà da la fundaziun "kulturserver.de" ScRL en il rom da la rait dals servers culturals. "Kulturserver.de" è ina communitad d'utilitad publica en l'internet cun plattafurmas che funcziunan bain e che porschan infurmaziuns davart ils champs culturals ils pli differents.

grischunCULTURA porscha a las participantas ed als participants servetschs supplementars sco instruments per crear ina homepage ubain simpels moduls da programmaziun per mussar sin l'atgna pagina d'internet las occurrenzas ch'èn vegnidas inscrittas en la plattafurma. Planisà è er in sectur betg public, nua che datas d'occurrenzas provisorias pon vegnir inscrittas, e quai cun la finamira da minimar collisiuns da termins ch'èn oz frequentas. In'ulteriura etappa da cumplettaziun èn infurmaziuns e links a la cultura architectonica dal Grischun.

grischunCULTURA è in servetsch dal chantun Grischun che vegn realisà en il rom dal punct central da svilup "commerzialisaziun da la cultura". La plattafurma vegn a crescher durant ils proxims mais ed a porscher adina dapli infurmaziuns. Oz - cun metter online la pagina d'internet - è il dumber da las endataziuns anc restrenschì, perquai che las datas pon vegnir inscrittas pir dapi quatter dis.

Per la publicaziun / emissiun vala in scumond da publicaziun fin venderdi, ils 25 da november 2005, a las 11.30.
graubündenKULTUR | grischunCULTURA | grigioniCULTURA | graubuendenCULTURE
www.graubuendenkultur.ch | www.grischuncultura.ch | www.grigionicultura.ch | www.graubuendenculture.ch
En cas da dumondas e per ulteriuras infurmaziuns As drizzai per plaschair a Charlotte Schütt.
Maletgs en qualitad da stampa, il text per las medias ed il logo pudais Vus chargiar directamain giu da la pagina d'internet www.grischuncultura.ch, rubrica "Media", sin Voss computer.

Gremi: uffizi da cultura
Funtauna: rg uffizi da cultura
Neuer Artikel