Cun questa chaschun ha lieu gievgia, il 1. da december 2005 a las 17.30, en il Karlihof in act da giubileum per giasts envidads e per la populaziun interessada. I discurran cusseglier guvernativ Claudio Lardi, archivari dal stadi Silvio Margadant e bibliotecari chantunal Wolfgang Giella. Il program musical accumpagnant surpiglian Ursina Brun, flauta, e Katrin Bamert, arpa. Ultra da quai èsi pussaivel da visitar l'exposiziun da giubileum.

L'archiv dal stadi e la biblioteca chantunala èn duas instituziuns che giogan ina rolla impurtanta en la vita culturala e scientifica dal chantun Grischun. L'istorgia da l'archiv va enavos fin al 15avel, quella da la biblioteca fin al 17avel tschientaner. Dapi l'onn 1530 è l'archiv da la republica da las trais lias stà plazzà en in tschaler d'arvieut da la chasa communala da la citad da Cuira. En il medem edifizi era er drizzada en la biblioteca da la citad da Cuira.

L'onn 1803 è l'archiv chantunal vegnì dischlocà en il "Neue Gebäu" u "chasa grischa" ch'era vegnida cumprada da la famiglia von Salis sco sedia per la regenza dal chantun Grischun. La biblioteca da la citad ha furmà - tar la fundaziun da la scola chantunala evangelica - la basa da la biblioteca da la scola chantunala. L'onn 1804 è quella vegnida dischlocada en la chasa Buol (oz museum retic), l'onn 1811 en la chasa da scola Nicolai e l'onn 1860 en l'edifizi nov da la scola chantunala sin la "Halde", per turnar sco biblioteca chantunala l'onn 1882 puspè en la chasa Buol. En vista a la situaziun da spazi precara en la chasa grischa ha il chantun cumprà il "Karlihof vegl" che sa chatta gist davos la chasa da la regenza cun l'intent d'utilisar quest edifizi per l'archiv, per la biblioteca e per l'administraziun. L'onn 1901 èn ils architects Walcher & Gaudy da Rapperswil vegnids incumbensads da projectar l'edifizi d'archiv e da biblioteca. Lur plans ha repassà l'impressari Gaudenz Issler da Tavau e realisà l'onn 1904. L'atun da l'onn 1905 han pudì vegnir surpigliadas las localitads novas. L'onn 1992 è vegnida fatga ina renovaziun generala da l'edifizi per l'adattar a las relaziuns actualas.

In'exposiziun sin il 1. plaun da la biblioteca chantunala dat ina invista en il svilup architectonic da l'archiv dal stadi e da la biblioteca chantunala.

Gremi: archiv dal stadi e biblioteca chantunala dal Grischun
Funtauna: rg archiv dal stadi e biblioteca chantunala dal Grischun