En il rom dal project chantunal "rumantsch grischun en scola" s'occupa actualmain ina squadra d'elavurar il concept per ina fibla nova en la lingua rumantscha da standard.
L'ovra per emprender a leger en rumantsch grischun vegn a s'orientar vi dals conturns e vi da las premissas d'emprender dals uffants ed als render abels da pudair leger, chapir e scriver pleds e frasas simplas fin la fin da l'emprim onn da scola.
Elements creativs grafics ed illustraziuns han ina impurtanza centrala per in med d'instrucziun per emprender a leger e survegnan pervi da quai bler spazi. En il cas da la fibla rumantscha duain ils uffants chattar cun agid dal material illustrativ - ultra da l'access a lur mintgadi - er in tal a la cultura rumantscha ed a la vita en las valladas rumantschas.
Pervi da quai vegnan tschertgads illustraturas ed illustraturs per la fibla che han sche pussaivel ina relaziun cun il Grischun e cun la Rumantschia.

Illustraturas ed illustraturs interessads s'annunzian p.pl. sut info@avs.gr.ch tar l'uffizi per la scola populara ed il sport.

Gremi: uffizi per la scola populara ed il sport
Funtauna: rg uffizi per la scola populara ed il sport