A chaschun da sia radunanza plenara dal november ha la conferenza svizra da las directuras e dals directurs da sanitad deliberà la "cunvegna interchantunala davart la coordinaziun e la concentraziun da la medischina fitg spezialisada (CICCM)". En l'avegnir duai questa cunvegna pussibilitar ina planisaziun naziunala da la medischina fitg spezialisada e remplazzar las actualmain 26 planisaziuns chantunalas. La CICCM duai permetter che la populaziun svizra vegnia provedida cun medischina fitg spezialisada en moda pli effizienta e qualitativamain meglra. La procedura da ratificaziun en ils chantuns duai esser terminada fin la primavaira 2006.

A chaschun da sia sesida dal schaner 2005 è la cumissiun per sanadad e fatgs socials dal cussegl grond (CSF), ensemen cun il cusseglier guvernativ Martin Schmid, tranter auter sa fatschentada cun la CICCM. En quest connex beneventa la cumissiun la CICCM sco in instrument che po meglierar tant la qualitad sco er la rentabilitad da las prestaziuns fitg spezialisadas ch'èn planisadas. Ella spera che la cunvegna vegnia er ratifitgada e realisada svelt da tut ils chantuns universitars.

Gremi: cumissiun per sanadad e fatgs socials
Funtauna: rg cumissiun per sanadad e fatgs socials