Las mesiras ch'il cussegl federal aveva relaschà ils 21 d'october 2005 per impedir che la grippa d'utschels vegnia importada en Svizra fineschan ils 15 da december 2005. A partir dals 16 da december 2005 dastgan las proprietarias ed ils proprietaris da giaglinom puspè laschar ir lur animals al liber. A partir da quest di èsi er permess da far exposiziuns da giaglinom ed occurrenzas sumegliantas.

Grazia a l'engaschi da persunas che tegnan giaglinom da professiun e sco hobi ha il scumond da tegnair il giaglinom al liber pudì vegnir realisà senza problems pli gronds. Pervi dal privel che utschels migrants avessan pudì importar il virus fitg contagius H5N1 (virus da la grippa d'utschels) èn vegnidas analisadas stgars 800 emprovas en Svizra e millis d'emprovas en ils pajais vischins. Fin uss n'han ins betg pudì chattar il virus da la grippa d'utschels tar utschels migrants en l'Europa centrala. A partir dals 16 da december 2005 dastga il giaglinom pia puspè ir al liber. Er martgads ed exposiziuns da giaglinom èn puspè permessas a partir da quest di.

Cun las analisas dals utschels migrants vegn dentant cuntinuà fin il schaner 2006. In nov scumond da tegnair il giaglinom al liber fiss tuttavia pussaivel, sch'i vegness chattà en quest connex in utschè migrant che fiss infectà cun il virus da la grippa d'utschels. Las possessuras ed ils possessurs da giaglinom vegnan supplitgads da resguardar quai correspundentamain.

Ultra da quai duai vegnir lantschà l'onn 2006 in program da surveglianza areguard la grippa d'utschels en manaschis da giaglinom, cunzunt en manaschis da tratga al liber.

Persuna da contact: dr. Kaspar Jörger, veterinari chantunal, 081 257 24 11

Gremi: Uffizi per la segirezza da victualias e per la sanadad d'animals dal Grischun
Funtauna: rg Uffizi per la segirezza da victualias e per la sanadad d'animals dal Grischun