Dals 18 da settember fin ils 6 d'october 2006 ha lieu a Flem Laax
Falera la sessiun d'atun da las chombras federalas. La regenza ha prendì
enconuschientscha dal concept da temp ch'è vegnì preschentà dals
servetschs dal parlament, ha engaschà l'organisaziun grischuna dal
project ed ha fixà - or dal puntg da vista grischun - ils princips per
realisar la sessiun.
Sessiun da lavur cun in program supplementar
Tenor l'avis da la regenza porscha la sessiun da las chombras
federalas en il Grischun la pussaivladad da promover la chapientscha
vicendaivla tranter las differentas regiuns e culturas da la Svizra.
Quai duai vegnir pussibilità tras contacts directs da las commembras e
dals commembers dal parlament cun la populaziun indigena e cun las
autoritads. Occurrenzas e visitaziuns en il senn d'in program
accumpagnant promovan la cuntraversa concreta cun la lingua e cultura
rumantscha sco er cun temas reals ch'èn impurtants per il Grischun. La
sessiun d'ordaifer è ina sessiun normala da lavur che duai esser
caracterisada d'in ambient da lavur agreabel e d'ina ospitalitad
grischuna generusa.
Realisaziun professiunala e ferma preschientscha dal rumantsch
La regenza menziunescha che las commembras ed ils commembers da las
chombras federalas vegnan en il Grischun per far lur lavur parlamentara.
I duai vegnir organisà mo in dumber limità d'occurrenzas accumpagnantas
cun duradas raschunaivlas sco er cun ina gronda valur d'experientscha.
Per la realisaziun professiunala ensemen cun ils servetschs dal
parlament a Berna èsi impurtant d'integrar al lieu tut las partenarias
impurtantas e tut ils partenaris impurtants. La sessiun pussibilitescha
en emprima lingia al chantun Grischun, a la regiun Surselva ed a las
vischnancas da staziunament Flem Laax Falera da sa preschentar a las
chombras federalas sco center da congress. Cun ina purschida d'emprima
classa po la regiun da congress s'inscenar en moda positiva e
cuntanscher ina valur agiuntada supplementara. La lingua e cultura
rumantscha duai esser fitg preschenta. Questa preschientscha resulta
dals contacts ordinaris da mintgadi sco er dad acziuns spezialas
supplementaras. Il program accumpagnant garantescha pussaivladads da
contactar er ils ulteriurs territoris linguistics en il chantun.
Decurs da la sessiun e program accumpagnant
La concepziun da la sessiun areguard il cuntegn ed areguard il temp
correspunda principalmain al decurs normal d'ina sessiun a Berna. Il
program accumpagnant pussaivel entaifer l'andament dal temp prevesa da
princip ina festa d'avertura ed ina festa da finiziun sco er differentas
scuntradas, occurrenzas culturalas e visitaziuns. Per quests eveniments
è previsiblamain reservà mintgamai in mez di per emna. Il concept
general per las occurrenzas uffizialas vegn fixà da la regenza.
Occurrenzas supplementaras regiunalas u localas duain vegnir coordinadas
da l'organisaziun grischuna dal project.
Organisaziun grischuna dal project
L'organisaziun generala dal project per realisar la sessiun d'atun
2006 en il territori linguistic rumantsch vegn fixada da la delegaziun
administrativa da las chombras federalas. Ina part da questa
organisaziun generala è l'organisaziun grischuna dal project ch'è
vegnida nominada da la regenza. Ella cumpiglia ils ressorts
infrastructura, logistica, segirezza e program accumpagnant. Integradas
èn tut las persunas grischunas impurtantas en connex cun la sessiun
d'ordaifer. Latiers tutgan - ultra dal park hotel Waldhaus e da l'arena
da las Alps sco organisaturs per propi - las vischnancas da staziunament
Flem Laax Falera, la corporaziun regiunala Surselva, la lia rumantscha e
Grischun vacanzas. La direcziun da l'organisaziun grischuna dal project
è chaussa dal chancelier.
Ulteriur proceder
A l'entschatta da mars 2005 approvescha la delegaziun administrativa
da las chombras federalas l'organisaziun dal project ed il concept da
temp per la sessiun. Il mars 2005 cumenza l'organisaziun grischuna dal
project sia lavur. En l'emprima fasa vegnan elavurads principalmain
concepts generals per la communicaziun e per il program accumpagnant sco
er il preventiv general 2006. Concepts detagliads suondan en
collavuraziun cun ils servetschs dal parlament da las chombras federalas
a partir da l'atun 2005.
Gremi: regenza
Funtauna: rg chanzlia chantunala dal Grischun