En l'onn idrologic 2003/2004 èn vegnidas consumadas en il Grischun 1816 milliuns uras kilowatt energia. En cumparegliaziun cun la perioda da l'onn passà è il consum s'augmentà per 1,9 pertschient. La producziun da forza electrica è stada durant la medema perioda cun 6978 milliuns uras kilowatt circa diesch pertschient sut la media da plirs onns.

Las ovras electricas dal Grischun annunzian mintga onn lur consum e lur producziun da forza electrica a l'uffizi d'energia. La statistica ch'è vegnida fatga en quest connex dat per l'onn idrologic 2003/2004 (october 2003 fin settember 2004) ils suandants resultats:

Augment dal consum d'electricitad
Il consum da forza electrica da 1816 milliuns uras kilowatt è s'augmentà per 1,9 pertschient cumpareglià cun la perioda da l'onn passà (perioda precedenta 1783 milliuns kWh).

Sch'ins guarda las singulas gruppas da consum ha importà l'augment da consum en il sectur da las chasadas, dal mastergn, da l'agricultura e da las prestaziuns da servetsch trais pertschient, da las viafiers (VR, VFF, viafier Matterhorn Gottard) mo in pertschient. Tar l'industria gronda è il consum d'energia sa reducì per ca. trais pertschient.

Cumpareglià cun la perioda precedenta è il consum da forza electrica en Svizra er s'augmentà per 1,9 pertschient a 55'840 milliuns uras kilowatt (perioda precedenta 54'775 milliuns uras kilowatt). Uschia è vegnì cuntanschì in maximum en il Grischun ed er en Svizra.

Reducziun da la producziun d'electricitad
Pervi da la setgira da la perioda d'enviern è la producziun da forza electrica da las ovras idraulicas dal Grischun stada cun 6978 milliuns uras kilowatt (perioda precedenta 7862 milliuns uras kilowatt) 10,4 pertschient sut la media da blers onns.

Las ovras idraulicas da la Svizra han producì en la medema perioda 34 056 milliuns uras kilowatt (38'313 milliuns uras kilowatt). La part dal Grischun da la producziun idraulica da forza electrica en Svizra ha importà 20,5 pertschient (20,5 pertschient) e 11,2 pertschient (11,7 pertschient) da l'entira producziun da forza electrica en Svizra.

Remartga per las medias:
Las graficas davart il consum e davart la producziun da forza electrica en il Grischun stattan a disposiziun sut www.energie.gr.ch - Statistik.

Infurmaziun:
- Johannes Bärtsch, uffizi d'energia dal Grischun, tel. 081 257 36 23

Gremi: Uffizi d'energia
Funtauna: rg uffizi d'energia