A las persunas che retschaivan prestaziuns supplementaras dastgan
chasas da tgira e partiziuns da tgira en ospitals metter a quint oz
taxas ch'èn mo uschè autas, sco quai che quellas persunas pon finanziar
tras lur entradas. Quai chaschuna ubain ina subvenziun cruschada tras
las abitantas e tras ils abitants cun ina meglra basa finanziala ubain
in deficit per las chasas da tgira; e quest deficit ston surpigliar las
vischnancas purtadras respectivamain las vischnancas da la regiun da
chasas. Subvenziuns cruschadas cuntrafan al princip ch'i duai vegnir
pajà en il sectur staziunar stabel il medem pretsch per la medema
prestaziun. Pervi dal surpli d'expensas exista il privel che persunas
cun relaziuns finanzialas disfavuraivlas na vegnan - cun ina stgisa u
l'autra - betg recepidas da las chasas.
Questa situaziun na cuntenta ni las chasas da tgira ni las
vischnancas purtadras. Perquai propona la regenza da midar la lescha per
promover la tgira da malsauns uschia, ch'ils custs betg cuvrids na ston
betg pli vegnir surpigliads da las vischnancas purtadras, mabain da
quellas vischnancas, en las qualas l'abitanta u l'abitant aveva ses
domicil durant ils ultims diesch onns avant l'entrada en la chasa da
tgira; e quai en proporziun da la durada dal domicil.
L'atun 2004 ha il cussegl grond incumbensà la regenza d'elavurar ina
soluziun per las taxas betg cuvridas d'abitantas e d'abitants da chasas
da tgira cun prestaziuns supplementaras maximalas.
La consultaziun per questa revisiun parziala da la lescha per
promover la tgira da malsauns dura fin la fin d'avrigl 2005. Dals
documents da consultaziun pon ins prender invista sut www.jpsd.gr.ch.
En l'avegnir pon ils chauns vegnir identifitgads per vita duranta
tras la ANIS
Tut ils chauns ston pudair vegnir identifitgads il pli tard a partir
dal cumenzament da l'onn 2007 tras ina tetovaziun u tras in microchip.
Questas indicaziuns ston - tenor il dretg federal - vegnir registradas
en ina banca da datas. Ils chauns en il Grischun vegnan annunziads e
registrads tar la "animal identity service SA" (ANIS). La regenza
grischuna ha concludì d'incumbensar per il 1. da fanadur 2005 la ANIS
cun questa lavur.
Responsabels per la caracterisaziun e per la registraziun dals
chauns èn las possessuras ed ils possessurs da chauns; l'annunzia
succeda tras la veterinaria u tras il veterinari cumpetent. La
tetovaziun u il microchip gidan a far scleriments en cas d'epidemias u
d'accidents tras morsas sco er tar chauns sparids, negligids u
bandunads.
La ANIS è er gia vegnida incumbensada dals chantuns Genevra, Vad,
Vallais, Giura e Sutsilvania; ulteriurs chantuns vegnan probablamain a
suandar.
Consultaziuns a la confederaziun
Uffizi federal da giustia - sboz da la lescha federala davart
l'applicaziun da mesiras repressivas en il dretg d'esters e tar il
transport da persunas per incarica da las autoritads federalas: La
regenza grischuna sustegna il sboz da l'uschenumnada lescha davart
l'applicaziun da mesiras repressivas (LAMR). En connex cun il
repatriament per incarica da la confederaziun hai dà differentamain
excess da violenza ch'èn per part ids a finir mortalmain.
Contribuziuns chantunalas a differentas instituziuns
Tgira da monuments: Var 875'000 francs ha la regenza approvà per
la restauraziun e la sanaziun dals suandants objects:
- chasa da cura, Bravuogn
- chaplutta da s. Carlo Borromeo, Buseno
- mulin, Salouf
- palaz Landolfi, Poschiavo
- baselgia da s. Antonio Abate, Roveredo
- chaplutta da s. Antoni da Padua, Degen
- baselgia evangelica da Seglias, Seglias
- baselgia evangelica da Bever, Bever
- chasa d'abitar nr. 59, Duvin
- picturas da paraid en la baselgia da Fex-Crasta, Segl
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun