La nova lescha davart la cassa da pensiun vegn tractada il zercladur dal parlament; la regenza ha deliberà la missiva correspundenta. En la missiva vegnan las incumbensas ch'èn previsas per la regenza en ils documents da consultaziun surdadas a la cumissiun administrativa. Uschia vegn gia anticipada l'organisaziun da la cassa da pensiun chantunala sco ch'ella è previsa suenter che la finanziaziun restanta è succedida cumplainamain. Per pudair realisar quai per il mument vegnan regladas dapli disposiziuns - cumpareglià cun ils documents da consultaziun - sin il stgalim da la lescha e paucas incumbensas circumscrittas detagliadamain vegnan assegnadas a la cumissiun administrativa.

En la lescha davart la cassa da pensiun èsi previs da nov che autras persunas benefiziadas - ultra da la conjugala u dal conjugal - pon retrair prestaziuns per surviventas e survivents. En il center stat l'uschenumnada "renta per la partenaria da vita u per il partenari da vita". Uschia pon er partenarias da vita u partenaris da vita betg maridads - sche las premissas determinadas cleramain èn ademplidas - survegnir prestaziuns per surviventas e survivents. En il rom da la segunda pitga ha uschia l'uschenumnada "partenanza da vita" da princip ils medems dretgs sco la lètg.

La nova lescha duai remplazzar l'ordinaziun vertenta davart la cassa da pensiun (OCP). Decisiva per relaschar ina lescha davart la cassa da pensiun è d'ina vart la nova constituziun chantunala ch'è en vigur dapi l'onn 2004. Da l'autra vart vegn il relasch davart la cassa da pensiun adattà il medem mument a las midadas da la 1. revisiun da la lescha federala davart la prevenziun professiunala per vegliadetgna, survivents ed invaliditad (LPP). Uschenavant ch'igl è pussaivel èn las disposiziuns las pli impurtantas da la OCP vegnidas surpigliadas materialmain praticamain senza midadas en la nova lescha davart la cassa da pensiun.

Il relasch da la lescha davart la cassa da pensiun cumpiglia - sco resumaziun - ils sequents accents:
- l'adattaziun formala dal relasch davart la cassa da pensiun a la nova constituziun chantunala;
- l'adattaziun materiala da las disposiziuns a la 1. revisiun da la LPP;
- la fixaziun da las tariffas da conversiun biometricamain correctas (chavazzin: svilup demografic midà);
- l'introducziun d'ina renta per la partenaria da vita u per il partenari da vita;
- la colliaziun dal dretg da prestaziuns d'invaliditad cun las premissas da l'assicuranza federala d'invaliditad, e
- l'adattaziun da la renta per uffants a la renta per orfnas ed orfens.

Examinà ils concordats e las cunvegnas areguard lur confurmitad cun la constituziun
La nova constituziun chantunala regla las cumpetenzas da la regenza e dal cussegl grond davart la conclusiun, la midada u la visada da cunvegnas interchantunalas ed internaziunalas. La veglia constituziun chantunala discurriva en general da concordats e da contracts internaziunals, senza s'exprimer davart lur midada e davart lur visada. Sin basa da quai èn vegnids examinads tut ils conclus d'entrada dal chantun Grischun a concordats ed a cunvegnas areguard lur confurmitad constituziunala; tredesch da quels ston vegnir revedids, perquai ch'els cuntegnan tenor la nova constituziun chantunala delegaziuns da cumpetenzas che n'èn betg pli admessas. Perquai ha la regenza relaschà la missiva correspundenta per ina "lescha davart l'adattaziun da conclus e da disposiziuns da participaziun vi da concordats e vi da cunvegnas a la constituziun chantunala". Il cussegl grond tracta il project en sia sessiun da zercladur.

Dretg da recurs da las associaziuns: Communicaziun empè da confruntaziun
Cun ina communicaziun ad ura ed averta pudessan en blers cas vegnir chattadas soluziuns en enclegientscha cun las organisaziuns che fan protesta, e quai er per projects cun effects gronds e dispitaivels per l'ambient: En sia consultaziun tar il sboz preliminar da l'iniziativa parlamentara "simplificaziun da l'examinaziun ecologica sco er impediment da l'abus cun precisar il dretg da recurs da las associaziuns" pretenda la regenza grischuna perquai d'introducir ina procedura da mediaziun. Uschia duain las autoritads pudair sistir da tut temp proceduras pendentas a favur d'ina mediaziun, sche las partidas pretendan quai communablamain, scriva la regenza a la cumissiun per dumondas giuridicas dal cussegl dals chantuns.

Gimnasi: Malgrà la nunpromoziun po la classa finala vegnir repetida
Gimnasiastas e gimnasiasts che na vegnan betg promovids ina giada fin tar la classa finala ed ina segunda giada en la classa finala, pon repeter da nov la classa finala. Fin ussa han talas scolaras e tals scolars stuì bandunar la scola avant la maturitad. Cun la revisiun parziala da la "ordinaziun davart il gimnasi en il chantun Grischun" han las scolaras ed ils scolars da la classa finala che na vegnan betg promovids per la segunda giada ils medems dretgs sco quellas scolaras e quels scolars che na reusseschan betg l'examen da maturitad; quellas e quels han gia pli baud pudì repeter la classa finala. La regenza resta tar il princip ch'ina scolara u ch'in scolar na po betg midar ad ina partiziun gimnasiala d'ina autra scola media grischuna suenter ch'ella u ch'el n'è betg vegnì promovì duas giadas en ina scola media grischuna. Ina finiziun ad ina scola media commerziala u ad ina scola media professiunala è però anc adina pussaivla.

La nova regulaziun da la salarisaziun da las mussadras e da las persunas d'instrucziun da la scola populara è vegnida messa en vigur
Per il cumenzament da l'onn da scola 2005/2006 ha la regenza mess en vigur las disposiziuns da la lescha da scolina, da la lescha da scola sco er da l'uschenumnada ordinaziun davart la salarisaziun da las persunas d'instrucziun che regla per part da nov la salarisaziun da las mussadras e da las persunas d'instrucziun da la scola populara. Ils augments da salarisaziun per singulas categorias da persunas d'instrucziun ch'èn vegnids deliberads dal cussegl grond han in effect en mintga vischnanca a partir dal cumenzament respectiv da l'onn da scola.

Consultaziuns a la confederaziun
Departament federal da l'economia - revisiun totala da l'ordinaziun davart la qualitad dal latg: La regenza grischuna è d'accord cun la repartiziun planisada da las incumbensas vertentas dal post central federal SICEL (servetsch d'inspecziun e da cussegliaziun per l'economia da latg) en las parts inspecziun, controlla da qualitad e cussegliaziun. Ils SICELs chantunals vegnan en il futur ad esser cumpetents mo pli per la part da l'inspecziun. La confederaziun na dastga dentant betg adossar ils custs als chantuns e stritgar u scursanir las subvenziuns federalas. Las prescripziuns vertentas davart l'organisaziun dal SICEL vegnan abolidas dal tuttafatg.

Projects da vias
- Via dal Güglia: Per la correcziun da la via en il vitg da Tinizong (Curtinatsch) ha la regenza approvà in credit da circa 1,2 milliuns francs.
- Via dal Bernina: La vischnanca da Puschlav survegn ina contribuziun chantunala da 25'000 francs per il passape nov a San Carlo. La regenza ha approvà il project.

Chaussas persunalas
- Daniel Imhof, actualmain a Wädenswil, è vegnì elegì per il 1. da zercladur 2005 sco chemicist chantunal e sco substitut dal manader dal post da servetsch da l'uffizi per la segirezza da victualias e per la sanadad d'animals.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun