La vischnanca da Puschlav ha surdà a la polizia chantunala las incumbensas da la polizia en il vitg. Persuenter paja ella ina contribuziun finanziala da 75'000 francs per onn. Cun questa contribuziun po er vegnir augmentà il dumber da persunal dal post da la polizia chantunala a Puschlav. La regenza ha approvà la cunvegna correspundenta tranter Puschlav ed il chantun retroactivamain per il 1. da schaner 2005.
En in concept ha ina gruppa da lavur elavurà ils princips per las incumbensas da la polizia communala che vegnan ademplidas da la polizia chantunala. Quest project da pilot a Puschlav dura dus onns e po vegnir transferì pli tard er sin autras vischnancas. La delegaziun d'incumbensas da la polizia communala a la polizia chantunala è daventada pussaivla pir tras il relasch da la nova lescha da polizia l'october 2004.

La regenza dat ses consentiment a la nova sutgera a Schlarigna
La regenza sustegna il project da la "Engadin snow and fun school SA" da remplazzar a Schlarigna il runal da Tschainas tras ina sutgera da quatter. Quai communitgescha ella en sia consultaziun a l'uffizi federal da traffic. Cun il project èn colliadas meglieraziuns da segirezza e da qualitad ch'èn urgentamain necessarias, cunquai ch'il terren vegn utilisà en emprima lingia per l'instrucziun da sport da naiv.

Lescha dal dretg da burgais: las finamiras da la confederaziun e dal chantun èn praticamain identicas
Sin plaun federal pretenda ina iniziativa parlamentara differentas adattaziuns da la lescha dal dretg da burgais. Spezialmain duain ils chantuns reglar ils princips da la procedura; dumondas da natiralisaziun che vegnan refusadas duain en mintga cas vegnir motivadas; plinavant duain ils chantuns nominar autoritads giudizialas che giuditgeschan sco ultimas instanzas chantunalas ils recurs cunter decisiuns da natiralisaziun. En sia consultaziun a l'uffizi federal da migraziun ha la regenza grischuna giuditgà a moda positiva las finamiras da l'iniziativa parlamentara. En il sboz tar la nova lescha chantunala dal dretg da burgais èn numnadamain gia resguardadas questas midadas essenzialas. Il termin da la consultaziun tar la nova lescha chantunala dal dretg da burgais è scadì il cumenzament da questa emna.

Princips clers per il "pachet fiscal" en la prevenziun professiunala
En connex cun l'emprima revisiun da la LPP vegnan er formuladas pli precisamain las disposiziuns fiscalas en l'ordinaziun (OPP 2). La segunda pitga - pia la prevenziun professiunala - duai avair privilegis fiscals er en l'avegnir. La proposta dal cussegl federal cuntegna dentant terms clers. Abus fiscals en la segunda pitga duain vegnir impedids. La regenza grischuna po da princip ir d'accord cun las finamiras dal nov project. Las midadas proponidas en la OPP 2 concernan en emprima lingia ils princips da la segunda pitga (p.ex. regularitad, collectivitad) che resultavan fin uss da la scienza e da la giurisdicziun. Anc adina exista in basegn d'explicaziun areguard las obligaziuns e las cumpetenzas da las expertas e dals experts da la cassa da pensiun sco er da l'autoritad chantunala da surveglianza; en sia consultaziun renda la regenza expressivamain attent che la procedura da consultaziun saja anc dal tuttafatg insuffizienta en quest sectur e che cunzunt la dimensiun da las obligaziuns d'examinaziun stoppia anc vegnir definida cleramain en la OPP 2.

Da vischnancas e regiuns
- Leschas communalas revedidas: La regenza ha approvà la revisiun parziala da la lescha da turissem d'Arosa e la revisiun totala da la lescha davart las taxas da cura da Medel/Lucmagn.
- Via da Stussavgia: Dad Acla fin Stussavgia Thalkirch è vegnida augmentada la ladezza maximala da 2,3 a 2,55 meters. En l'avegnir è la via da Stussavgia uschia charrabla sin tut il traject da Versomi a Stussavgia Thalkirch per vehichels a motor pesants d'ina ladezza da 2,55 meters per il transport da rauba.
- Via sursilvana: Tar ils spartavias da Laax ost e da Laax vest vegn la sveltezza maximala reducida a 60 km/h sin ina lunghezza da mintgamai ca. 200 meters.
- Via chantunala a Giuf: Davent da l'access a l'autostrada A13 fin Avras-Cresta vegn dauzà il pais maximal per diesch tonnas a 28 tonnas.
- Schiers, Medel/Lucmagn, Mustér: Per ils trais projects da guaud ha la regenza approvà totalmain ca. 820'000 francs. Tar quests uschenumnads projects integrals sa tracti spezialmain da sanaziuns da vias da guaud e da rempars.

Contribuziuns chantunalas a differentas instituziuns
- Campiunadis mundials da snowboard da la FIS: Per manar tras ils campiunadis mundials da snowboard da la FIS da las junioras e dals juniors 2005 ad Arosa ha la regenza approvà ina contribuziun chantunala. Il campiunadi mundial ha lieu dals 4 fin ils 8 d'avrigl.
- Institut autalpin da Ftan: La regenza ha approvà in credit d'agid d'investiziun da la confederaziun da ca. 550'000 francs e la contribuziun chantunala correspundenta per sanar la chasa da scola e l'internat da mats.
Projects da vias
La regenza ha approvà en tut ca. 147 milliuns francs per quatter projects da vias:
- via dal Partenz: sviament da Saas (tunnel da Saas, colliaziuns da Trun - Pardiel e da Waldhof - Pagrüeg);
- via dal Partenz: colliaziun da Landquart - Grüsch (sanaziun da la punt da Taschinas);
- via sursilvana: sviament da Flem (sanaziun da la punt cotschna);
- via da l'Engiadina: colliaziun da Scuol vest - Scuol ost (sanaziun da la punt da Clozza).

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun