Co statti cun l'egualitad dals umens e da las dunnas en il Grischun?
Per l'emprima giada vegnan preschentadas extendidamain las datas
impurtantas, caracterisadas tenor la schlattaina, en ina broschura edida
dal post da stab per dumondas d'egualitad. Ella cuntegna datas davart
ils temas populaziun, chasadas e famiglias, furmaziun, activitad da
gudogn, entradas, lavur da chasa e tgira d'uffants, sanadad e politica.
La cumparegliaziun statistica mussa che l'egualitad da las schanzas da
las dunnas e dals umens n'è anc betg cuntanschida en il Grischun. Uschia
è la situaziun economica da las dunnas cumpareglià cun quella dals umens
main buna. Las dunnas gudognan circa in tschintgavel pli pauc, ellas èn
pertutgadas pli fitg da la dischoccupaziun, prestan percunter dapli
lavur nunpajada. Malgrà che las dunnas giuvnas recupereschan fermamain
en la furmaziun, n'ha mintga terza dunna en il Grischun mesirà cun la
populaziun residenta nagin examen professiunal. La quota da divorzis è
en il Grischun pli auta che la media svizra, la quota da naschientschas
è sa sminuida fermamain. Il dumber dad umens e da dunnas che vivan
sulets en il Grischun è s'augmentà, entant ch'i dat adina pli paucas
chasadas da famiglias. La represchentaziun da las dunnas en la politica
ed en las posiziuns da cader è sut la media, cumpareglià cun il rest da
la Svizra. Differenzas tranter las dunnas ed ils umens sa mussan dentant
er en connex cun la sanadad (ils Grischuns han pli savens surpais che
las Grischunas) u tar la mobilitad (las dunnas van pli bler a pe ch'ils
umens). La broschura porscha la basa da discussiun davart il stadi da
l'egualitad dals umens e da las dunnas en il Grischun ed illustrescha
ils champs d'acziun per la politica d'egualitad.
La broschura "Cifras e fatgs. Umens e dunnas. Grischun" po vegnir
empustada gratuitamain en tut las trais linguas chantunalas tar il post
da stab per dumondas d'egualitad, Loestrasse 37, 7000 Cuira, tel. 081
257 35 70 u per mail info@gleichstellung.gr.ch
Gremi: Post da stab per dumondas d'egualitad
Funtauna: rg Post da stab per dumondas d'egualitad