Interpresas da take-away e servetschs da furniziun (p.ex. curriers da pizza) na duain betg pli stuair dumandar ina permissiun per lavur da notg e da dumengia. Uschia avessan els en il futur il medem status giuridic sco manaschis da restauraziun. La regenza saja perencletga cun questa proposta per midar l'ordinaziun 2 tar la lescha da lavur, scriva ella en sia consultaziun al secretariat da stadi da l'economia.

Contribuziuns chantunalas a differentas instituziuns *
- Stabiliments da sport ed edifizis da sport: La regenza ha approvà quatter dumondas da contribuziun e concedì per quai ina contribuziun maximala dal fond da sport da totalmain circa 300'000 francs. Cun quai vegnan il club da hockey da Puschlav e Valposchiavo calcio a construir ina plazza da hockey sin glatsch ed in champ da ballape, il club da curling da Tavau vegn ad eriger in center da curling e l'uniun da chavaltgar Trun e conturn vul cumprar ina maschina da planar e 25 obstachels da sigl. La summa totala per quests quatter projects importa circa set milliuns francs.
- Consorzi per aua persa Sablun, Rueun: Per engrondir e sanar la serenera ha la regenza garantì ina contribuziun chantunala da circa 215'000 francs.

Projects da vias
- Via dal Fuorn: A Sta. Maria V.M. ed a Fuldera vegn sanada la via chantunala. Per quest intent ha la regenza deliberà ina contribuziun totala da circa 650'000 francs.

Chaussas persunalas
- En l'uffizi per la scola populara ed il sport è Dante Peduzzi (1952) da Cama vegnì elegì per il 1. d'avust sco nov inspectur da scola e manader da district per il Grischun talian.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun