Il dretg federal regla la basa per zonas per quietar il traffic. El
differenziescha en quest connex tranter zonas da tempo 30, zonas
d'inscunter cun ina spertadad maximala signalisada da 20 km/h e zonas da
pedunas e da peduns. Dapi l'onn 2001 èn numnadamain zonas da tempo 30
pussaivlas sin tut las vias. L'ordinaziun federala davart la
signalisaziun da las vias fixescha mo pli las directivas minimalas per
quai. Sin quai han las vischnancas reagì: Las dumondas per zonas da
tempo 30 che cumpiglian er vias chantunalas èn creschidas fermamain. La
regenza ha ussa fixà tge mesiras per quietar il traffic che pon vegnir
fatgas per tge vias chantunalas e sut tge cundiziuns che quai ha da
succeder.
Las vias chantunalas ston primarmain satisfar als basegns ed a la
funcziun dal traffic sin via; quai vala spezialmain per las vias
chantunalas principalas (p.ex. tut las axas dal nord al sid e da l'ost
al vest cun excepziun da las autostradas). Perquai vul la regenza
approvar dumondas per zonas da tempo 30 mo en moda fitg restrictiva,
sche quellas tangheschan ina via chantunala principala. Excepziuns
prevesa ella però per trajects da vias principalas, sin ils quals ins
sto gia oz ir cun ina spertadad reducida, sco stretgas en il center dal
vitg, parts da trajects senza trottuar u lieus nunsurvesaivels. Decisiv
en quest connex è che la part la pli gronda da las participantas e dals
participants dal traffic na van oz betg pli spert che 42 km/h sin quests
trajects - pia dal cumenzament fin a la fin da la zona da tempo 30
planisada; quest tempo sto vegnir resguardà d'almain 85 pertschient dal
traffic, da l'uschenumnà T-85. Cun introducir zonas da tempo 30 pon las
sveltezzas vegnir reducidas - quai mussan las experientschas -
maximalmain però per tschintg fin otg km/h.
Ultra da quai ha la regenza decidì ch'ella na permettia er en il
futur naginas mesiras architectonicas sco portals d'entrada ed
impediments sin vias principalas.
Vias chantunals èn er las vias da colliaziun chantunalas; er ellas
servan - sco las vias principalas - primarmain al traffic e betg a
pedunas ed a peduns. Tenor las directivas novas èsi pervi da quai mo
pussaivel da far zonas da tempo 30 sin vias da colliaziun, sch'il T-85
na surpassa betg 44 km/h dal cumenzament fin a la fin da la zona da
tempo 30 planisada.
Gremi: regenza
Funtauna: rg departament da giustia, polizia e sanitad