Navigation

Inhaltsbereich

  • Erste Mitteilung
  • Neuen Beitrag einfügen
Ils chantuns han stuì decider l'onn 2002 per tge gruppas professiunalas, che mettan a quint lur prestaziuns sur l'assicuranza obligatoria da malsauns, ch'i vala in stop d'admissiun. Avant aveva la confederaziun relaschà la mesadad da l'onn 2002 l'uschenumnada "ordinaziun davart la limitaziun da l'admissiun da furniturs da prestaziuns per pratitgar a quint da l'assicuranza obligatoria da malsauns" e limità quella a trais onns fin la mesadad da l'onn 2005. La regenza grischuna ha sin quai decidì l'atun 2002 da limitar il stop d'admissiun mo sin medias e sin medis - dentistas e dentists per exempel n'èn betg suttamess ad in stop d'admissiun en il Grischun; novas praticas da media u da medi na dastgan betg vegnir avertas, praticas existentas pon dentant vegnir surpigliadas da tut temp. Uschia avess duì vegnir franà il ferm augment dals custs en il sectur da l'assicuranza obligatoria da malsauns. La confederaziun vul ussa prolungar il termin da la disposiziun actuala fin la stad 2008.

La regenza grischuna saja anc adina persvadida che la limitaziun d'admissiun na frainia betg essenzialmain ils custs en il sectur da la sanadad, scriva ella en sia consultaziun a l'uffizi federal da sanitad. Sche l'ordinaziun da l'onn 2002 duess restar en vigur anc trais ulteriurs onns, ston vegnir concretisadas differentas dumondas. Tranter auter er, sche quest stop valia er per medias e medis che avevan avant la mesadad da l'onn 2002 lur admissiun per pratitgar la professiun, ma che n'han betg fatg diever da quella fin ussa. Uschiglio vegnissan talas medias e tals medis oz bunamain sfurzads dad avrir in'atgna pratica anc avant ch'il stop d'admissiun vegnia prolungà per ulteriurs trais onns.

Mo projects federals per ils 5 da zercladur
A las proximas votaziuns dal pievel dal cumenzament da zercladur na vegnan suttamess a la votaziun nagins projects da lescha chantunals, perencunter dus projects da lescha federals:
- il conclus federal dals 17 da december 2004 davart l'approvaziun e la realisaziun da las cunvegnas bilateralas tranter la Svizra e la UE per l'associaziun a la reglamentaziun da Schengen e da Dublin sco er
- la lescha federala dals 18 da zercladur 2004 davart il partenadi registrà da pèrs da la medema schlattaina (lescha da partenadi, LPart).

Consultaziuns a la confederaziun
- Administraziun federala da finanzas - realisaziun da las recumandaziuns revedidas dal "groupe d'action financière sur la lutte contre le blanchiment de capitaux" (GAFI): La regenza grischuna sustegna las recumandaziuns revedidas dal GAFI per cumbatter la lavada da daners suspectus e la finanziaziun dal terrorissem. Questas recumandaziuns valan sco standard internaziunal.

Da vischnancas e regiuns
- Fläsch: La punt dal Rain da Fläsch è en in nausch stadi. Pervi da quai vegn il pais maximal reducì da 18 a 13 tonnas. Ultra da quai ston ils camiuns observar ina distanza minimala da 100 meters.
- Mut e Luzein: La regenza ha approvà la nova lescha da taxas da cura e da turissem respectivamain la revisiun da la lescha da taxas da cura.
- Siat: La revisiun da la lescha communala da taglia po ussa entrar en vigur; la regenza l'ha approvada.
- Bever: La regenza ha approvà il reglament per las zonas da protecziun ed il plan da las zonas da protecziun per las funtaunas "God da Spinas"; els servan a garantir a lunga vista la qualitad da l'aua da baiver.

Contribuziuns chantunalas a differentas instituziuns
- Scola professiunala da Cuira: La regenza ha da princip approvà il project preliminar per engrondir il stabiliment da la scola professiunala da Cuira ed empermess per quai ina contribuziun da circa 980'000.- francs.
- visarte.grischun: Sco contribuziun da stipendi per artistas ed artists da l'atelier da Paris ha la regenza approvà ina contribuziun annuala da 20'000 francs.
- leger.GR: Las medias d'uffants e da giuvenils dal Grischun ch'èn participadas essenzialmain a la creaziun ed a l'amplificaziun dals fatgs da biblioteca en il Grischun survegnan ina contribuziun annuala da 40'000 francs..
- transit.grischun: Per il project transit.tavau, tar il qual vegn mussà a Tavau art en il spazi public davart il tema dal sport d'enviern, ha la regenza approvà totalmain 30'000 francs per ils onns 2005 e 2006. Fin ussa ha il chantun er gia sustegnì ils projects parzials tansit.cuira e transit.engiadina.
- Scola auta professiunala da domadus Basileas: Per publitgar la lavur da perscrutaziun "Haus-Siedlung-Landschaft Val Lumnezia/Alta Capriasca" ha la regenza approvà ina contribuziun da 10'000 francs.
- Associaziun grischunas da ballape: Per il turnier da ballape U15 da la ARGE ALP dals 12 fin ils 15 da matg a Cavareno/Trentino èn vegnids approvads 8200 francs.
- Promoziun da la cultura: Sco contribuziuns e sco garanzias da deficit ha la regenza approvà ina summa totala da 186'000 francs. Cun quels raps vegnan sustegnids totalmain 15 projects.

Projects da vias
- Per differents projects da via ha la regenza deliberà totalmain circa 7,5 milliuns francs. Sin la via da l'Engiadina per ils projects sin ils trajects Spissermühle-Mulins, Spinai-Crusch Tschlin sco er per la punt Spuondas sur l'Ova da Suvretta; sin la via dal Malögia per il project d'ina nova rundella inclusiv in passape tar l'access da Segl Maria; sin la via dal Fuorn per il project Laschadura-Champsech e sin la via da l'Alvra per il project Tischbach-Chaneletta; sin la via taliana en il Mesauc per ils projects Lostallo-Sorte e Soazza nord-Ponte Rasiga; sin la via da la Tumleastga per il project Seglias entaifer il vitg; sin la via da Cunter per il project Küblis-punt da la Landquart; sin la via dal Scanvetg per il project per lung dal Langwieser Kirchenrank sco er sin la via dal Landwasser per il project Schmelzboden-Glaris.
- Da princip ha la regenza er approvà il program da sanaziun cunter la canera per la via taliana en il sectur da la vischnanca da Mesauc e la correcziun ed il schlargiament da la via da colliaziun tar la via da la Lumnezia davent dal spartavias via da la Lumnezia-Sursaissa-S. Martin.

Chaussas persunalas
- Luzius Meyer-Kurmann (1956), actualmain a Turitg, è vegnì elegì sco nov manader da la partiziun "furmaziun supplementara" da la scola auta da pedagogia a Cuira e Renato Lanfranchi (1966) dad Igis è vegnì tschernì sco manader da project en l'uffizi da sanadad.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel