Navigation

Inhaltsbereich

  • Erste Mitteilung
  • Neuen Beitrag einfügen
L'avust 2003 ha il cussegl grond prolungà per ulteriurs trais onns la fasa dal project da pilot per la refurma da l'administraziun GRiforma. A medem temp ha el incumbensà la direcziun dal project cun tschintg incaricas. La fin da l'onn 2005 va la segunda fasa dal project da pilot a fin e l'october 2006 vegn il cussegl grond previsiblamain a debattar danovamain davart GRiforma.

Ditg èsi stà plitost quiet en connex cun GRiforma, il project da refurma da l'administraziun grischuna. Betg perquai ch'il project fiss vegnì sistì u fiss sa durmentà, mabain perquai ch'igl è vegnì lavurà a moda intensiva vi da las incaricas dal cussegl grond. La direcziun dal project ed ils servetschs da pilot disponan uss d'ulteriuras enconuschientschas ed experientschas. En la newsletter da GRiforma vegn rapportà en intervals da dus fin trais mais davart questas experientschas, davart enconuschientschas impurtantas e davart il stadi actual dal project.

Spezialmain a quellas collavuraturas ed a quels collavuraturs che n'èn betg involvids directamain en il project vul ins dar uschia ina meglra invista da la refurma. En il center stat dentant er l'infurmaziun dal cussegl grond. Tras la giunta directiva da GRiforma - che sa cumpona da commembras e da commembers da la regenza, dal parlament e da l'administraziun - è il cussegl grond bain integrà en il project e participà a las decisiuns da princip. Las ulteriuras parlamentarias ed ils ulteriurs parlamentaris vegnan dentant en contact cun ils instruments da GRiforma mo tar la debatta dal preventiv e tar il rendaquint. Ins als vul infurmar davart ils instruments impurtants da GRiforma tranter auter cun la newsletter ed als tegnair al current davart l'ulteriur svilup. Sin basa d'in rapport cumplessiv, che tracta er las tschintg incaricas, duain els pudair prender l'october 2006 ina decisiun davart l'ulteriur andament da la refurma.

L'emprima newsletter da GRiforma cuntegna in curt rapport davart il stadi da lavur actual en ils servetschs da pilot e dat ina survista da las incaricas dal cussegl grond. En ina intervista mussa la presidenta da la regenza dr. Eveline Widmer-Schlumpf il niz da GRiforma dal puntg da vista persunal.

Ulteriuras infurmaziuns davart GRiforma chattais Vus sut http://www.fmd.gr.ch/griforma.

Gremi: departament da finanzas e militar
Funtauna: rg departament da finanzas e militar
Neuer Artikel