Dacurt ha la regenza deliberà per mauns dal cussegl grond la missiva
tar la revisiun totala da la lescha davart las vias. Il parlament duai
tractar quest sboz en la sessiun d'avust.
Las novaziuns principalas sa laschan resumar sco suonda:
- La revisiun totala reducescha la legislaziun davart las vias dad
actualmain set a mo anc dus relaschs.
- Las premissas per il dretg d'ina avertura tras il chantun vegnan
adattadas nua ch'ina vischnanca giauda l'avantatg d'in sviament e nua
che la dimensiun da l'avertura da fracziuns surpassa quest intent per la
fracziun.
- Il sboz stgaffescha ina basa legala per il traffic betg motorisà
che regla d'ina vart las cumpetenzas, da l'autra vart il dretg da
contribuziun.
- Adattaziuns e simplificaziuns tar la procedura tranter il chantun
e las vischnancas d'ina vart e tar la relaziun da vischin tranter il
chantun e las proprietarias ed ils proprietaris che cunfineschan cun la
via da l'autra vart surpiglian la pratica vertenta ed elimineschan
intschertezzas.
Cun il sboz da consultaziun era anc vegnì intenziunà da formular en
moda pli severa las premissas per il dretg d'avertura tras il chantun.
Chargias da vias specificas per vischnancas che vegnan chaschunadas
d'averturas charas da fracziuns u d'averturas dublas avessan da nov duì
vegnir mitigiadas sur la gulivaziun da finanzas intercommunala. Sin basa
da l'evaluaziun da las consultaziuns ha la regenza decidì da renunziar
per entant d'adattar il quorum d'abitantas e d'abitants ch'è necessari
per fracziuns ed er da renunziar d'abgiuditgar las averturas dublas. Sin
la gulivaziun da las differentas chargias da vias duai vegnir returnà
pli tard en connex cun la nova concepziun da la gulivaziun da finanzas
intercommunala. I duai er vegnir impedì che las stentas da fusiun da las
vischnancas che vegnan actualmain discutadas na vegnian betg
engrevgiadas da novas chargias da vias u pudessan schizunt far naufragi.
Per motivs dal tractament egual sa midan las premissas per il dretg
però en quels cas, tar ils quals ina vischnanca profitescha da
l'avantatg supplementar d'in sviament da la vischnanca e nua che la
dimensiun da l'avertura d'ina fracziun ha il caracter d'ina avertura da
quartier e da detagl. Per che la directiva da spargn dal cussegl grond
possia tuttina vegnir ademplida cumplainamain, vegnan prendidas mesiras
da spargn alternativas en il quint da las vias.
Gremi: departament da construcziun, traffic e selvicultura dal
Grischun
Funtauna: rg departament da construcziun, traffic e selvicultura dal
Grischun