Navigation

Inhaltsbereich

  • Erste Mitteilung
  • Neuen Beitrag einfügen
La regenza dal chantun Grischun sustegna las stentas da la confederaziun da cumbatter en moda pli effizienta acziuns criminalas en l'internet. Per quest intent ha la confederaziun preschentà ina revisiun dal cudesch penal e da la lescha penala militara. En quella vegnan regladas las responsabladads dals uschenumnads "providers" sco er las cumpetenzas da la confederaziun e dals chantuns. Ils providers pon ubain pussibilitar l'access a l'internet, ubain metter a disposiziun la plattafurma tecnica per arcunar ils cuntegns, ubain metter a disposiziun las infurmaziuns ed ils cuntegns sco tals.
En sia consultaziun a l'uffizi federal da giustia davart il rapport "criminalitad en la rait" explitgescha la regenza dentant ch'ils purschiders da las plattafurmas tecnicas na possian betg daventar il bratsch prolungà da las autoritads da persecuziun penala cun stuair da princip dar vinavant tut ils indizis davart eventualas infurmaziuns illegalas sin lur plattafurmas. Ultra da quai refusa la regenza grischuna d'introducir in dretg da la polizia criminala federala da dar directivas envers las autoritads chantunalas da persecuziun penala - per exempel er a la procura publica.

Grischun dal sid: l'access als lieus da scolaziun en il Tessin è vegnì simplifitgà
Scolaras e scolars da las valladas dal sid dal Grischun che frequentan ina scola professiunala en il Tessin, pon far quai ussa sut premissas pli simplas; ils custs per questas facilitaziuns surpiglia il chantun Grischun. La regenza ha concludì da permetter en general da frequentar en il Tessin las scolaziuns professiunalas a temp cumplain ed ils onns d'emprendissadi da basa sco creadra da vestgadira per vestgadira da dunnas, sco dissegnadra u sco dissegnader da construcziun auta, sco constructura u sco constructur e sco electronista u sco electronist, sco informaticra u sco informaticher, sco polimecanista u sco polimecanist e sco automaticra u sco automaticher.
Scolaziuns a temp cumplain ordaifer il chantun Grischun èn fin ussa vegnidas permessas mo en moda restrictiva. La situaziun geografica e la lingua da las vals dal sid dal Grischun pretendan en questa dumonda dentant ina bainvulientscha generala dal chantun Grischun. Per onn èn quai stads fin ussa circa diesch scolaras e scolars da las valladas dal sid dal Grischun che han frequentà lur scolaziun professiunala a temp cumplain en il chantun Tessin.

La nova lescha davart il notariat va en vigur il matg
La regenza grischuna ha mess en vigur per il 1. da matg la nova lescha davart il notariat; il termin da referendum è scadì senza ch'i saja vegnì fatg diever da quel. Il cussegl grond aveva deliberà la nova lescha en la sessiun d'october 2004.

Da vischnancas e regiuns
- Sursaissa: La regenza ha approvà la planisaziun d'utilisaziun nova cun differentas cundiziuns generalas. Dal puntg da vista da la planisaziun dal territori èsi ussa pussaivel da construir il stabiliment da golf e da temp liber en il territori da Dachli.
- Occurrenzas da sport La 6avla etappa dal tour de Suisse dals 16 da zercladur 2005 maina da Bürglen UR sur il pass da l'Alpsur ad Arosa, entant ch'ils 23 e 24 da fanadur ha lieu ils swiss bike masters en ils conturns da Küblis. La regenza ha approvà domaduas rutas.
- Fanas: Il chantun sa participescha als custs da la renovaziun dal provediment d'aua (2. etappa) cun ina contribuziun da circa 64'000 francs.

Contribuziuns chantunalas a differentas instituziuns
- Uniun dal lavuratori da litografia e da gravura dal chastè da Haldenstein: La regenza ha concludì ina contribuziun da gestiun unica da 10'000 francs per l'onn 2005. Questa uniun dat ad artistas ed ad artists la pussaivladad da far litografias e gravuras cun agid d'ina cussegliaziun professiunala.
- Telefericas da Claustra-Madrisa: Per renovar la teleferica sin l'alp da Saas ha la regenza deliberà in credit d'agid d'investiziun da la confederaziun inclusiv la contribuziun chantunala da circa dus milliuns francs.

Projects da vias
Per differents projects da via ha la regenza deliberà totalmain circa 3,3 milliuns francs: sin la via dal Güglia per engrondir la storta d'Araschgen, sin la via dal Malögia per sanar il traject tranter Plaun dal Crot e Malögia, sin la via sursilvana per sanar il traject da Sumvitg a Spligias, sin la via da Tschiertschen per renovar la punt da la val dal Steinbach e sin la via da Sertig per construir ina fermada per il traffic public.

Chaussas persunalas
- Dr. med. Martina Gabriela Maranta da Cuira, dr. med. Doris Lehman, actualmain a Glaruna, e dr. med. Mihailo Sekulovski, actualmain a Turitg, èn vegnidas elegidas sco medias superiuras resp. è vegnì elegì sco medi superiur a l'ospital da dunnas Fontana.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel