Ils "meds d'instrucziun dal Grischun" (pli baud: chasa editura per
meds d'instrucziun dal chantun Grischun) van en l'avegnir novas vias
areguard la producziun da meds d'instrucziun. Entant ch'ils meds
d'instrucziun vegnivan elavurads fin uss bunamain mo en il temp liber,
duain las collavuraturas ed ils collavuraturs vegnir distgargiads da qua
davent a moda adequata da lur ulteriuras incumbensas. Er la producziun
da meds d'instrucziun na vegn - sche pussaivel - betg pli pajada per
ura, mabain tras pauschalas resp. tras salaris fixs. In exempel fitg
real: Ina persuna d'instrucziun che instruiva fin uss a 100%, dat da nov
scola a 60% e lavura a 40% vi da la producziun da meds d'instrucziun. La
relaziun d'engaschament tranter la vischnanca e la persuna d'instrucziun
resta; ils custs da salari per ils 40% da la producziun da meds
d'instrucziun paja il chantun cumplainamain a la vischnanca.
Questa midada en la producziun da meds d'instrucziun augmenta la
valur da questa lavur pretensiusa ed impurtanta, e quai sut cundiziuns
da basa pli professiunalas. La nova regulaziun entra en vigur a medem
temp sco l'elavuraziun dals meds d'instrucziun per introducir il
rumantsch grischun en scola. La producziun da questa nova generaziun da
meds d'instrucziun succeda en cooperaziun dals meds d'instrucziun dal
Grischun e dal project chantunal "rumantsch grischun en scola".
I vegn dà in grond pais d'elavurar tut ils cuntegns en stretga
collavuraziun cun las persunas d'instrucziun en las regiuns, nua ch'ils
meds d'instrucziun vegnan er applitgads pli tard. Uschia duai vegnir
garantida ina relaziun directa tranter il nov material d'instrucziun e
la pratica d'instrucziun.
Persunas d'instrucziun che han interess da collavurar vi da quests
meds d'instrucziun vegnan infurmadas davart ulteriurs detagls en ils
inserats en il fegl uffizial dal chantun (ediziun dals 28 d'avrigl 2005,
nr. 17), en il fegl scolastic grischun (ediziun dal matg, nr. 8) u sut:
www.rumantsch-grischun.ch.
Gremi: Departament d'educaziun, cultura e protecziun dall'ambient
dal Grischun
Funtauna: rg direcziun dal project "rumantsch grischun en scola"