Il post spezialisà per dumondas da spitex e da vegliadetgna, che appartegna a l'uffizi da sanadad, survegn ina incumbensa supplementara. En consequenza da la revisiun da l'ordinaziun davart il rembursament da custs pervi da malsogna e d'invaliditad tar las prestaziuns supplementaras ha la regenza surdà ad el dapli responsabladad. Uschia fixescha il post spezialisà per dumondas da spitex e da vegliadetgna en l'avegnir il profil d'exigenzas da persunas da tgira che assistan persunas dependentas d'agid che retschaivan indemnisaziuns e che vivan a chasa. Il post spezialisà giuditgescha unicamain cas che na pon betg vegnir surpigliads d'ina organisaziun da la spitex renconuschida.

Da vischnancas e regiuns
- Tenna: La regenza garantescha a la vischnanca da Tenna - cun resalva che la confederaziun paja sia contribuziun garantida - ina contribuziun chantunala da maximalmain 120'000 francs per realisar la 13avla etappa da la meglieraziun generala. La contribuziun vegn duvrada per realisar la via champestra Mitti-Usserberg.
- Molinis: Per engrondir il provediment d'aua ha la regenza approvà ina contribuziun chantunala da 42'000 francs.

Contribuziuns chantunalas a differentas instituziuns
- Abitadi evangelic per persunas attempadas Masans a Cuira: Per installar ina staziun per persunas dementas en l'abitadi evangelic per persunas attempadas Masans conceda la regenza ina contribuziun chantunala da 175'000 francs. Quai correspunda a 50 pertschient dals custs maximalmain imputabels, numnadamain da 350'000 francs.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun