La regenza facilitescha l'access a la scola auta professiunala da
pedagogia dal Grischun (SAP) per studentas e per students
extrachantunals. Il plan da studi general vegn midà uschia che las
studentas e ch'ils students extrachantunals pon eleger tranter la
didactica dal rom talian resp. rumantsch sco segunda lingua e la la
didactica dal rom franzos sco segunda lingua, e quai a partir da
l'annada da studi 2004/2007. Fin ussa ha il plan da studi general da la
SAP previs per las futuras persunas d'instrucziun da la scola primara
che la scolaziun per instruir la segunda lingua stoppia succeder
obligatoriamain en ina segunda lingua chantunala. L'obligatori d'ina
segunda lingua chantunala sco segunda lingua ha però engrevgià da
recrutar studentas e students extrachantunals, perquai ch'il talian ed
il rumantsch n'èn en nagin chantun da la Svizra tudestga linguas
obligatorias sin il stgalim secundar II. Lur scolas medias porschan en
il cas normal franzos ed englais sco roms da basa. Ultra da quai ha la
regenza augmentà en il plan da studi general da la SAP la dotaziun en la
didactica dal rom englais sco segunda lingua per in modul sin ussa dus
moduls. Sco cumpensaziun vegn scursanì il champ da studi "introducziun
en sistems culturals, socials ed economics sco er en la sistematica
scientifica" per il modul "spazi cultural Grischun". Plinavant ha la
regenza punctuà che - en connex cun la realisaziun da la nova lescha
davart la scola auta da pedagogia - duai vegnir examinada in'avertura da
la purschida concernent la segunda lingua per studentas e per students
grischuns. L'examinaziun duai vegnir fatga dal cussegl da la scola auta
e duai succeder expressivamain cun resguardar adequatamain ils interess
dal Grischun.
Da vischnancas e regiuns
- Mon: La regenza ha approvà il project per zavrar il guaud e la
pastgira da Mon ed ha garantì a la vischnanca ina contribuziun
chantunala da maximalmain 56'700 francs per quai.
- San Murezzan: La regenza ha approvà la planisaziun d'utilisaziun
per il territori parzial dal "God Laret". Ella consista d'ina
cumplettaziun da la lescha da construcziun communala, dal plan da zonas
"sectur dals abitadis" 1:2500 "God Laret", dal plan general da furmaziun
(PGF) e dal plan general d'avertura 1:1'000 (PGA) "God Laret" sco er da
las prescripziuns correspundentas davart il PGF e davart il PGA "God
Laret".
- Stussavgia-Camana: La vischnanca da Stussavgia-Camana survegn -
cun resalva che la confederaziun paja sia contribuziun garantida - ina
contribuziun chantunala da maximalmain 428'000 francs per realisar la
12avla etappa da la meglieraziun generala. Quai correspunda a 40
pertschient dals custs imputabels, numnadamain da 1'070'000 francs.
- Sour: Tenor la descripziun correspundenta dal perimeter da la
vischnanca vegn designà sin l'alp Flix in territori da protecziun dals
bulieus limità a trais onns.
- Occurrenzas da sport La 15avla etappa dal giro d'Italia dals 23 da
matg 2005 maina da Livigno (I) a Lissone (I). En quest connex vegn entrà
sin territori grischun cunquai che l'entira caravanna vegn manada da
Livigno sur la furcla da Livigno, La Rösa, San Carlo, Puschlav, S.
Antonio, Le Prese, Brusio, Campascio e Campocologno. La regenza ha
approvà la ruta.
Contribuziuns chantunalas a differentas instituziuns
- Tgira da monuments: Il chantun Grischun sa participescha cun
maximalmain 60'000 francs a la conservaziun ed a la restauraziun da la
baselgia catolica s. Anton e s. Leonard a Rona. Ils custs totals
importan 893'700 francs.
Chaussas persunalas
- Remo Fehr, manader da la partiziun "aria/canera/radiaziun" tar
l'uffizi per la natira e l'ambient, è vegnì numnà sco substitut dal
manader da l'uffizi.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun