La regenza venda las aczias da la swiss international air lines SA ch'ella aveva acquistà l'onn 2002 cun il consentiment dal cussegl grond. L'acquist da 20'323 aczias da la swiss per il pretsch da 56 francs per aczia cun ina summa totala dad 1'138'088 francs era vegnì fatg da quellas uras sco act da solidaritad per il salvament da l'anteriura swissair. Ussa èsi definitiv che la swiss vegn surpigliada da la lufthansa. En quest connex ha la air trust SA a Zug preschentà il cumenzament da matg da quest onn in'offerta da surpigliada per tut las aczias nominativas che sa chattan en il public. Il pretsch d'offerta sa chatta tar 8.96 francs netto per aczia nominativa, entant ch'il curs da bursa da las aczias da la swiss sa chattava ils 3 da matg 2005 tar 8.87 francs. Da questa offerta resulta in import da 182'094.10 francs. Il cussegl administrativ da la swiss recumonda als acziunaris publics, tar ils quals tutga er il chantun Grischun, d'acceptar l'offerta. La regenza è da l'avis che la vendita da las aczias da la swiss saja la meglra soluziun, tant pli perquai ch'i na dat strusch alternativas en quest connex.

Davart las dumondas EOZ decida da nov l'uffizi da planisaziun
La fin da mars è il termin da referendum cunter la nova lescha davart la planisaziun dal territori per il chantun Grischun (LPTGR), concludida dal cussegl grond ils 6 da december 2005, scadì senza ch'el saja vegnì duvrà. Ussa ha la regenza relaschà las disposiziuns executivas necessarias tar questa lescha. In punct impurtant da la nova ordinaziun davart la planisaziun dal territori per il chantun Grischun (OPTGR) è la nova regulaziun da la cumpetenza per decider davart las 1'300 dumondas da construcziun per onn per edifizis e stabiliments ordaifer la zona da construcziun: fin ussa èn las decisiuns vegnidas prendidas sin stgalim dal departament. Da nov è l'uffizi chantunal da planisaziun cumpetent per quai. Tenor la nova ordinaziun sa numna quel dal rest da nov uffizi per il svilup dal territori. Quai cun l'intent d'exprimer l'element dinamic en la planisaziun dal territori. Ultra da quai regla la OPTGR oravant tut las differentas proceduras da la planisaziun dal territori, sco en spezial la procedura per la planisaziun locala, la procedura per la permissiun da construcziun, la procedura per il plan da quartier e la procedura per incassar las contribuziuns d'avertura. Questas regulaziuns chaschunan in'unificaziun da las proceduras correspundentas en l'entir chantun. Il medem mument cun relaschar la OPTGR ha la regenza concludì da metter en vigur il nov dretg da planisaziun (LPTGR ed OPTGR) per il 1. da november 2005.

Da vischnancas e regiuns

• Cuira: La regenza approvescha il project per l'engrondiment da la chasa da scola dal stgalim superiur Giacometti a Cuira. Per quai deliberescha ella ina contribuziun chantunala da 377'600 francs u maximalmain diesch pertschient dals custs imputabels da 3'776'000 francs.
• Fideris e Samedan: La regenza ha approvà las revisiuns totalas da las leschas davart las taxas da cura.
• Ardez: La regenza approvescha la revisiun totala da la lescha davart las taxas da cura.
• Morissen: La regenza approvescha il project per construir ina fermada d'autos da posta d'ina vart da la via a Cuschnaus. Dals custs paja il chantun maximalmain 24'500 francs, repectivamain 35 pertschient da la summa da construcziun totala calculada.
• Mon: La vischnanca survegn ina contribuziun da 18'744 francs per engrondir il provediment d'aua.

Contribuziuns chantunalas a differentas instituziuns

• Fundaziun Giuvaulta: La regenza ha approvà definitivamain il project per midar, per engrondir e per sanar l'edifizi da scola ed il lieu d'occupaziun dal center per pedagogia speziala a Giuvaulta. Per quai deliberescha ella ina contribuziun chantunala da 5'098'500 francs. Quai correspunda a 70 pertschient dals custs imputabels, numnadamain da 7'283'600 francs.
• Club da beachvolley Zizers: Per construir da nov in implant da beachvolley cun dus champs deliberescha la regenza ina contribuziun maximala dal fond da sport da totalmain 18'000 francs. Quai èn maximalmain 20 pertschient dals custs imputabels.

Projects da vias
La regenza ha approvà totalmain 880'000 francs per la construcziun e per la sanaziun da divers trajects da via:

• via da Stussavgia: traject Rüti-Stussavgia Plaz
• via dal Schin: traject Seglias - Solas

Chaussas persunalas

• Gion Darms da Glion è vegnì numnà sco substitut dal manader dal post da servetsch da l'uffizi da construcziun auta e sco manader da la partiziun "facility management".

Gremi: regenza
funtauna: rg chanzlia chantunala dal Grischun