Navigation

Inhaltsbereich

  • Erste Mitteilung
  • Neuen Beitrag einfügen
Il medem mument cun la missiva per la nova concepziun dal provediment dal chantun cun ospitals preschenta la regenza al cussegl grond ina missiva per in'ulteriura revisiun parziala da la lescha per promover la tgira da malsauns. Cun questa revisiun duai vegnir creada la basa legala per che la regenza possia integrar gratuitamain las valurs da facultad da l'ospital chantunal da dunnas Fontana en la nova fundaziun da l'ospital chantunal dal Grischun. Plinavant vegnan midadas las tariffas da contribuziun dal chantun a las prestaziuns medicinalas ed a las investiziuns da la fundaziun. Quellas midadas èn daventadas necessarias cun integrar l'ospital chantunal da dunnas Fontana en la fundaziun da l'ospital chantunal dal Grischun.

La fundaziun ospital chantunal e regiunal retic a Cuira e la fundaziun ospital da la crusch a Cuira vegnan fusiunadas ordavant a la nova fundaziun da l'ospital chantunal dal Grischun. La furmaziun da la fundaziun è colliada cun la serrada da l'ospital da la crusch a termin mesaun. In intent d'utilisaziun pussaivel e probabel ord vista medicinala da l'ospital da la crusch è il manaschi d'in center per geriatria. In potenzial da respargn essenzial datti mo, sch'ina da las trais plazzas vegn serrada. Numnadamain ston vegnir fusiunads ils manaschis da 24 uras sco urgenza, medischina intensiva, servetsch d'operaziun u guardias da notg e vegnir unidas la medischina interna generala e la chirurgia generala. Cun in transferiment da sia facultad en la nova fundaziun da l'ospital chantunal dal Grischun vegn integrà l'ospital chantunal da dunnas Fontana en quella fundaziun. L'ospital chantunal da dunnas Fontana ha memia grondas capacitads per cuvrir ils basegns actuals en ils secturs da la ginecologia e da l'assistenza al part. Pervi da quai vegn el avert per ulteriuras disciplinas ed uschia er per pazients masculins.

Ils respargns che pon vegnir realisads grazia a la nova concepziun da la plazza d'ospitals tar ils custs da gestiun chaschunan in retard da l'augment dals custs renconuschids pro cas e pia in retard da l'augment da las contribuziuns chantunalas e communalas per las prestaziuns medicinalas. Per las vischnancas sa reducescha la ristga ch'ellas stoppian prestar contribuziuns al manaschi d'ospital per cuvrir il deficit.


Gremi: regenza
Funtauna: rg chanzlia chantunala dal Grischun
Neuer Artikel