Navigation

Inhaltsbereich

  • Erste Mitteilung
  • Neuen Beitrag einfügen
Da vischnancas e regiuns
- Fideris: La regenza approvescha la revisiun parziala da la constituziun communala.
- Claustra: Per la via da colliaziun Claustra-Monbiel vegn augmentada la ladezza maximala da 2,30 a 2,55 meters.
- Pragg-Jenaz: Per la via da colliaziun tranter Pragg-Jenaz, Furna e Hinterberg vegn dauzà il pais maximal da 18 a 20 tonnas per transports e per chars annexs destinads per rauba lunga.
- Valzeina: Per la via da colliaziun Überlandquart-Valzeina vegn dauzà il pais maximal dad 11 a 18 tonnas, mintgamai per il temp dals 15 da matg fin ils 15 d'october.
- Riom-Parsonz: La regenza ha approvà - cun las resalvas usitadas - la planisaziun d'utilisaziun relaschada da la vischnanca da Riom-Parsonz per engrondir ils indrizs d'ennavar en il territori da skis "Savognin" e per in parc d'uffants a Tigignas.
- Sent: Per l'engrondiment da las vias champestras Von, Loden e da la via Flüs approvescha la regenza ina contribuziun chantunala da maximalmain 189'210 francs. Ils rest dals custs da totalmain 530'000 francs surpiglia la confederaziun.
- Sumvitg: La regenza approvescha il plan general da furmaziun 1:1'000 Marias, 1. etappa "etappas e realisaziun". Cun in rinviament vegn approvà il plan general d'avertura 1:1'000 Marias, 1. etappa "furmaziun nova". Il rinviament concerna il cas, sch'igl avess da resultar - cunter tuttas aspectativas - ina gronda quantitad da material che sto vegnir deposità. Alura pudessan ins divergiar temporarmain da la planisaziun avant maun.
- Stampa: La regenza dat la permissiun a la vischnanca da Stampa da manar la scola primara da Malögia (inclusiv la scolina) en moda bilingua talian/tudestg, e quai en il rom d'in experiment da scola limità als onns da scola 2005/2006, 2006/2007, 2007/2008. Per l'accumpagnament da l'instrucziun e scientific da l'experiment metta il chantun a disposiziun maximalmain 90'000 francs.
- Engiadina: Il 10avel maraton d'inline da l'Engiadina dals 25 da zercladur 2005 maina puspè da Malögia a S-chanf. La regenza ha approvà las rutas.
- Lai: Il di da Ferrari e Maserati dals 2 e dals 3 da zercladur 2005 en la regiun da Lai po avair lieu sin la via chantunala tranter Valbella e Lai sin il traject parzial tranter la plazza da parcar da la pendiculara dal Rothorn, da la plazza da parcar dal Güglia, da la Voa Dieschen e da la pendiculara dal Rothorn. La regenza ha approvà la ruta.

Contribuziuns chantunalas a differentas instituziuns
- Project "academia da las Alps Engiadina/San Murezzan": Il chantun sustegna il project d'InnoTour "academia da las Alps Engiadina/San Murezzan" cun ina contribuziun dad 80'000.- francs. Il project custa totalmain 913'000 francs. Da quels surpiglian la confederaziun 400'000 francs e la regiun da vacanzas da l'Engiadin'auta ed il circul da l'Engiadin'auta mintgamai 80'000 francs. La basa da questa fatschenta è il conclus federal per promover l'innovaziun e la cooperaziun en il turissem (InnoTour).
- Scola auta da tecnica ed economia (SATE) da Cuira: La regenza approvescha il project preliminar per l'engrondiment da la cafeteria/mensa da l'edifizi da la SATE a la Ringstrasse/Pulvermühlestrasse. Ella fa quint cun custs totals da 599'500 francs. Vi da quels presta il chantun ina contribuziun da maximalmain 299'750 francs u da 50 pertschient.
- Center da furmaziun Palottis a Schiers: La regenza approvescha ina contribuziun speziala da 6'390 francs. I sa tracta d'ina contribuziun extraordinaria a scolas da puras e d'economia da chasa tenor l'art. 52 da la lescha chantunala davart la furmaziun professiunala.
- Open airs: Ils open airs da Scharàns, Valragn, Stussavgia, Val Lumnezia, Chapella e Malans vegnan sustegnids cun garanzias da deficit d'ina summa totala da maximalmain 24'000 francs.

Projects da vias
- Per renovar la cuvrida da la via da l'Alvra ha la regenza garantì ina contribuziun dad 800'000 francs.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel