Las uniuns per l'ambient sustegnan la resgia - quai considerond la
fauna, la flora e las structuras natiralas.
Tras la construcziun da la resgia planisada da la firma Stallinger
ScRL e tras l'utilisaziun supplementara da la resursa "lain" che resulta
da quai basegni differents scleriments forestals. Per ils lieus da Vaz
sut e da Domat, ch'èn en discussiun, èsi ultra da quai necessari da far
scleriments areguard la cuntrada e la scienza natirala.
Cun l'associaziun traffic ed ambient (ATA), represchentada da Stefan
Grass, cun il WWF dal Grischun, represchentà d'Anita Mazzetta, e cun la
pro natura dal Grischun, represchentada da Christian Geiger, ha gì lieu
in'emprima discussiun. En quest connex è vegnì preschentà il project ed
ins ha discutà singuls puncts da conflict.
La construcziun d'ina resgia vegn da princip beneventada da las
uniuns per l'ambient, premess che l'utilisaziun da laina prenda resguard
dals biotops da guaud, dals animals e da las plantas sco er da las
structuras natiralas dal guaud. Plinavant na dastga la resgia betg
chaschunar in boom da construir vias da guaud. Ultra da quai ston ins
resguardar l'intensitad da l'intervenziun en il guaud, il concept
logistic per apportar e per transportar davent la materia prima "lain"
sco er aspects spezials dals lieus.
Igl è vegnì fixà da prender per mauns il process ensemen cun las
instituziuns involvadas (vischnancas da staziunament, uffizi per la
natira e l'ambient, uffizi forestal, uffizi per economia e turissem).
Ils interess ils pli differents duain vegnir coordinads in cun l'auter,
uschia ch'els mainan a la finamira.
Gremi: uffizi per economia e turissem
Funtauna: rg uffizi per economia e turissem