Navigation

Inhaltsbereich

  • Erste Mitteilung
  • Neuen Beitrag einfügen
La regenza ha deliberà la fin da l'onn 2004 il concept general "rumantsch grischun en scola". En quel respunda ella da princip las dumondas ch'èn vegnidas tschentadas en la "incumbensa Farrér" concernent l'introducziun dal rumantsch grischun en l'instrucziun da scola.

Sco "CR da referenza" per l'ulteriur svilup en il sectur dal rumantsch grischun en scola declera il conclus da la regenza intenziunadamain bler en moda detagliada: en ina part introductiva vegn guardà enavos sin il svilup da la lingua da standard rumantscha dal cumenzament. En il segund chapitel vegn declerà il svilup a partir da la sessiun d'avust 2003 (decisiun concernent ils meds d'instrucziun dal cussegl grond sco er incumbensa Farrér) fin a la preschentaziun da la proposta da la gruppa da lavur dal DECA l'october 2004. Il terz chapitel tematisescha las opiniuns ch'èn vegnidas inoltradas l'october ed il november davart quest sboz. Il quart chapitel è il chapitel central. Cun quel vegnan preschentadas a la fin finala las decisiuns da la regenza davart l'ulteriur andament.
La basa per il quart chapitel furma la proposta ch'è vegnida preschentada l'october 2004 da la gruppa da lavur. Las midadas essenzialas ch'en vegnidas fatgas sin basa da las opiniuns entradas pertutgan ils suandants secturs:
- En il concept general deliberà na vegn betg pli tematisà d'introducir il rumantsch grischun sco lingua pledada en singulas lecziuns (sco che quai è vegnì proponì dal sboz sut il titel "RG activ 2").
- Las numerusas pussaivladads da las vischnancas concernent il termin da partenza da l'introducziun èn anc vegnidas extendidas. Uschia na pon per exempel vischnancas da pionier betg mo cumenzar cun il "RG activ" dal 2007/08, mabain er en ils onns suandants.
- En il sectur da la furmaziun supplementara èn previs - suenter la scolaziun fundamentala - differents curs d'approfundaziun. Cun quai vegn reagì sin la crititga dal temp da scolaziun, per il qual i saja stà previs in temp memia stgars en il sboz.
- En il rom da la "lescha federala davart agids finanzials per mantegnair e promover la lingua e cultura rumantscha e taliana" vegnan dumandads agids finanzials federals per ils custs dal project.
- Pervi da la situaziun giuridica actuala duain succeder ils pass d'introducziun dals proxims var diesch onns exclusivamain en las vischnancas che giavischan quai explicitamain. Per ils onns 2008/2009 garantescha la regenza ina procedura da mediaziun. La finamira da la mediaziun è da confermar la chapientscha vicendaivla da tut las perunas pertutgadas e da chattar ina soluziun en enclegientscha. Suenter ston vegnir examinadas ed eventualmain exequidas eventualas adattaziuns dal dretg.

Dal conclus da la regenza pon ins prender invista en furma integrala sin la homepage www.rumantsch-grischun.ch.

Gremi: regenza
Funtauna: rg departament d'educaziun, cultura e protecziun da l'ambient
Neuer Artikel