Las prescripziuns da la lescha pretendan che tut ils chauns possian vegnir identifitgads ubain tras ina tetovaziun ubain tras in microchip e ch'els sajan registrads en ina banca da datas.
L'obligaziun da registrar ils chauns è vegnida relaschada sin basa da la discussiun davart chauns privlus ch'era vegnida fatga publicamain la stad 2001. Responsabels per nudar e per registrar ils chauns èn las possessuras ed ils possessurs da chauns; l'annunzia a la "animal identity service SA" (ANIS) succeda tras la veterinaria u tras il veterinari cumpetent.

En quest connex ston vegnir resguardadas las suandantas reglas:
- en il Grischun ston - a partir dal 1. da fanadur 2005 - tut ils chagniels vegnir nudads entaifer 3 mais suenter la naschientscha cun in microchip e vegnir registrads tar la ANIS
- chauns naschids avant il 1. da fanadur 2005 che n'èn anc betg nudads, ston vegnir nudads cun in microchip e registrads fin il pli tard il 1. da schaner 2007
- chauns ch'èn nudads gia oz cun in microchip u cun ina tetovaziun, ma che n'èn betg registrads tar la ANIS, ston vegnir annunziads tar la ANIS fin il pli tard ils 31 da december 2006

La nudada e la registraziun dals chauns gidan a far scleriments en cas d'epidemias e suenter accidents tras morsas sco er tar chauns sparids, negligids u bandunads.

Persuna che dat infurmaziuns:
Kaspar Jörger, manader da l'uffizi per la segirezza da victualias e per la sanadad d'animals, tel. 081 257 24 11.

Gremi: uffizi per la segirezza da victualias e per la sanadad d'animals
Funtauna: rg uffizi per la segirezza da victualias e per la sanadad d'animals