Ils chantuns da la Svizra orientala realiseschan ensemen ina scola
da polizia ad Amriswil en la Turgovia. Quella cumenza il 1. d'october
2006. La regenza grischuna ha approvà quest project cun sia
participaziun a la "cunvegna davart la fundaziun e davart il manaschi
d'ina scola da polizia da la Svizra orientala". La decisiun vegn
prendida cun la resalva ch'il cussegl grond integreschia ils credits
necessaris en il preventiv 2006. Per cuvrir ses basegn da polizistas e
da polizists sto la polizia chantunala grischuna pudair trametter
annualmain - tut tenor il svilup da l'effectiv - 10 fin 15 aspirantas ed
aspirants ad Amriswil. In grond problem per la cooperaziun dal chantun
Grischun a quest project è l'integraziun da las scolaras e dals scolars
da lingua taliana. Er per quellas e per quels duai ina scolaziun ad
Amriswil star en il center. Uschia duain ellas ed els survegnir ina
instrucziun da sustegn e duain pudair lavurar cun meds d'instrucziun da
lingua taliana. In'obligaziun explicita per ina scolaziun ad Amriswil
datti per las parts contrahentas dentant mo per las aspirantas e per ils
aspirants da lingua tudestga. Uschia restan avertas autras soluziuns per
las aspirantas e per ils aspirants da lingua taliana, tranter quellas
ina scolaziun en il chantun Tessin. Il plan dal quint da gudogn e da
perdita ch'è vegnì fatg per la scola da polizia da la Svizra orientala
fa quint cun custs annuals da totalmain 2.5 milliuns francs. Il chantun
Grischun fa quint cun ina contribuziun annuala da basa da 134'185
francs. Quella vegn calculada sin basa da la grondezza dal corp e dal
dumber da la populaziun. Vitiers vegn ina taxa da scola da 23'180 francs
per persuna. Quai dat in import da 412'345 francs per dudesch persunas
en scolaziun.
La lescha chantunala da polizia entra en vigur il 1. da fanadur
2005.
Ils 26 da schaner 2005 è il termin da referendum cunter la nova
lescha chantunala da polizia scadì senza ch'el saja vegnì duvrà. La
regenza vegn a metter en vigur la lescha per il 1. da fanadur 2005. Il
medem mument vegn abolida l'ordinaziun correspundenta da la polizia
chantunala. Plinavant ha la regenza relaschà la nova ordinaziun da
polizia respectiva. Quella entra en vigur ensemen cun la nova lescha.
Il Grischun sa participescha a la nova cunvegna interchantunala
davart las scolas autas professiunalas
La cunvegna interchantunala davart las scolas autas professiunalas
(CSAP) dals 4 da zercladur 1998 scada per la fin da l'onn da studi
2004/2005. La conferenza dals chantuns da cunvegna, tranter quels il
chantun Grischun, ha ussa deliberà ina nova cunvegna. Spezialmain tar il
model da finanziaziun haja dà midadas. Uschia po la conferenza dals
chantuns da cunvegna decider da nov per exempel per tuts u per singulas
studentas u per singuls students in auter model d'indemnisaziun che la
pauschala actuala per studenta u per student per onn. Per exempel in
model che sa basa sin las prestaziuns da studi absolvidas. Plinavant
vegn dauzà il grad da garanzia da 75 sin 85 pertschient. Quai vul dir
ch'ils chantuns ston cuvrir da nov 85 pertschient dals custs da
scolaziun. Quai na correspunda betg als giavischs da la regenza
grischuna ch'è s'exprimida en la consultaziun da dauzar il grad da la
cuvrida dals custs pir cun la realisaziun da la refurma da la gulivaziun
da finanzas e da la repartiziun da las incumbensas tranter la
confederaziun ed ils chantuns (RFI). Cun dauzar las tariffas a partir da
l'onn da scola 2005/2006 cun la finamira da cuntanscher in grad da la
cuvrida dals custs dad 85 pertschient vegn il quint dal chantun Grischun
engrevgià annualmain per 571'000 francs netto a partir da l'onn 2006.
Ils custs supplementars èn gia resguardads en ils plans da finanzas
2005-2008 e 2007-2010. Il volumen total da las contribuziuns che vegnan
pajadas sin basa da la cunvegna interchantunala davart las scolas autas
professiunalas importa actualmain 8,5 milliuns francs. En quest connex
vala il princip da la libra circulaziun, tenor il qual las studentas ed
ils students pon tscherner libramain il lieu da lur scolaziun en tut la
Svizra. Uschia croda davent ina pussaivladad directa da diriger las
finanzas.
Il program per la decleraziun da taglia vegn sviluppà vinavant
A las pajataglia ed als pajataglia dal chantun Grischun stat dapi
l'onn 2001 a disposiziun il program da computer "softax" per far la
decleraziun da taglia. La regenza ha concludì da laschar sviluppar
vinavant quest program. Per meglierar e per amplifitgar las funcziuns,
tranter auter l'applicaziun er sin sistems operativs da macintosh e da
linux, vegnan deliberads 370'800 francs.
Nova cunvegna da prestaziun cun la federaziun chantunala da las
uniuns grischunas da samaritans
La regenza ha approvà la nova cunvegna da prestaziun da la
federaziun chantunala da las uniuns grischunas da samaritans (FCUS) e
dal chantun Grischun. Tenor quella survegn la FCUS dal chantun ina
contribuziun annuala da 10'000 francs per ademplir incumbensas dal
servetsch da salvament. Las incumbensas cumpiglian la scolaziun ed il
perfecziunament da persunas laicas, l'activitad sco instructura u sco
instructur tar las colonnas sveltas, l'agid tar l'indriz e tar il
manaschi da posts da first-responder, l'activitad da figurantas e da
figurants en cas d'exercizis d'acziun e d'alarm sco er samaritanas e
samaritans che vegnan mess a disposiziun en las vischnancas
respectivamain per ils pumpiers communals. Per sias acziuns a chaschun
dals tschintg exercizis chantunals d'acziun e d'alarm survegn la FCUS
supplementarmain ina indemnisaziun da mintgamai 1000 fin 1500 francs.
Consultaziun tar la lescha federala davart mesiras cunter la
propaganda violenta e cunter la violenza a chaschun d'occurrenzas da
sport
La regenza grischuna beneventa il sboz da la lescha davart mesiras
cunter la propaganda violenta e cunter la violenza a chaschun
d'occurrenzas da sport. Ella beneventa cunzunt las quatter mesiras da
prevenziun previsas sin plaun federal, numnadamain il scumond da raiun,
la restricziun da bandunar il pajais, l'obligaziun d'annunzia e - sco
mesira la pli rigurusa - la fermanza da polizia da 24 uras. A la regenza
paran questas ed ulteriuras mesiras planisadas d'esser adattadas per
tegnair davent meglier hooligans d'occurrenzas da sport e da proteger
terzas persunas da violaziuns - spezialmain en reguard al campiunadi
d'Europa da ballape 2008 en Austria ed en Svizra.
Da vischnancas e regiuns
- Tenna: La vischnanca da Tenna survegn ina contribuziun chantunala
pauschala da 18'176 francs als custs cun dretg da contribuziun per
renovar ed engrondir il provediment d'aua.
- Scanvetg central: La regenza ha approvà il project "lavuratori
forestal/halla per depositar stalizzas dal Scanvetg central" da las
vischnancas da Molinis, Pagig, Peist e St. Peter. Als custs cun dretg da
subvenziun dad 800'000 francs vegn garantida ina contribuziun chantunala
da maximalmain 168'000 francs.
- Occurrenzas da sport: Ils 20/21 d'avust han lieu pliras
occurrenzas da ciclissem en il rom dal "ewz challenge da las Alps 2005".
La sonda, ils 20 d'avust, vegn realisada la concurrenza "ride with the
cycling champions" sin in cirquit tranter Lantsch ed il lai da
Planeiras. La dumengia, ils 21 d'avust, fan las sportistas ed ils
sportists il "traject da challenge" che maina da Lantsch sur Alvagni e
sur ils pass da l'Alvra e dal Bernina a Livigno ed enavos sur Zernez,
Silvaplauna ed il pass dal Güglia. Plinavant stat sin il program il
"traject classic" che maina sur il pass da l'Alvra a La Punt-Chamues-ch,
Silvaplauna e sur il pass dal Güglia enavos a Lantsch. La regenza ha
approvà tut ils trajects.
- Ils 27/28 d'avust vegn manada tras la "1. cursa internaziunala da
muntogna d'autos classics d'Arosa". A l'occurrenza da sport a motor sa
participeschan autos da cursa ed autos da turas istorics da las annadas
1946-1976. La regenza ha approvà la ruta sin la via chantunala tranter
Langwies ed Arosa.
- Val da Schluein: Per las dustanzas da la val da Schluein sin il
territori da las vischnancas da Schluein, da Falera e da Ladir vegn
garantida ina contribuziun chantunala da totalmain 375'000 francs als
cust calculads da 1'500'000 francs, e quai cun resalva da la garanzia da
subvenziun da la confederaziun. Cun quels daners pon vegnir fatgas -
suenter la gronda bova da l'avust 2004 - las reparaziuns necessarias e
construidas bloccadas novas.
- Consorzi da scola per la scola primara e per la scolina da las
vischnancas da Casti e d'Alvaschagn: La revisiun parziala dals statuts
dal consorzi vegn approvada da la regenza.
Chaussas persunalas
- La plazza da l'administratur dal register da commerzi tar
l'inspecturat dal register funsil e register da commerzi ch'è daventada
libra perquai ch'il titular d'enfin ussa è vegnì pensiunà vegn occupada
cun Arno Lombardini che viva ad Andeer.
Gremi: regenza
Funtauna: rg chanzlia chantunala dal Grischun