La regenza deliberescha per la consultaziun la revisiun totala da la
lescha davart il dretg da burgais. Quella pretenda in'adattaziun dal
dretg chantunal a la legislaziun federala, particularmain areguard las
taxas da natiralisaziun. Il sboz da la lescha qua avant maun cumpiglia
centralmain ils suandants champs da regulaziun:
- taxas da natiralisaziun,
- attenziun giuridica en la procedura da natiralisaziun,
- protecziun da datas,
- meds legals cunter decisiuns da natiralisaziun,
- premissas da qualificaziun,
- necessitad dal domicil e termins da domicil,
- renunzia a la perdita legala dal dretg da burgais tar la
natiralisaziun e
- renatiralisaziun.
Il medem mument tegna la revisiun totala da la lescha chantunala
davart il dretg da burgais qua avant maun quint da las novaziuns da la
giurisdicziun e da la pratica giuridica actuala. Dals documents da
consultaziun pon ins prender invista a partir da glindesdi, ils 17 da
schaner, sut www.jpsdgr.ch.
L'examen da qualificaziun per chatschaduras e chatschadurs vegn
adattà
La revisiun parziala da l'ordinaziun davart l'examen da
qualificaziun per chatschaduras e chatschadurs vegn approvada da la
regenza. Da princip cuntegna l'examen d'armas e da tir da nov in examen
d'armas teoretic ed in examen pratic davart la manipulaziun da l'arma e
da tir. En quest connex na vegn l'examen teoretic betg pli fatg a bucca,
mabain da nov en scrit ed en moda separada da l'examen pratic davart la
manipulaziun da l'arma e da tir. Il decurs da l'examen concepì da nov
dat al chantun la pussaivladad d'al manar tras en moda pli effizienta e
porscha er avantatgs a las candidatas ed als candidats. Las novas
regulaziuns valan a partir dal 1. da favrer 2005.
Questa revisiun è ina mesira dal project concernent l'examinaziun da
las structuras e da las prestaziuns per sanar las finanzas dal chantun.
Cun il conclus dal cussegl grond èn vegnids scursanids ils meds
finanzials ch'èn stads a disposiziuns enfin ussa a la polizia chantunala
ed a l'uffizi da chatscha e pestga per far l'examen.
Da vischnancas e regiuns
- Valendau: Per averturas, rempars e reorganisaziuns da la
producziun forestala ed agricula ha la regenza approvà ina contribuziun
chantunala da ca. 180'000 francs.
- Vischnanca da Farera: Per l'avertura dal guaud "Plan Davains"
deliberescha la regenza contribuziuns chantunalas da ca. 380'000 francs.
- Filisur: Per il project integral "Jenisberg" approvescha la
regenza contribuziuns chantunalas da ca. 555'000 francs per averturas e
per segiradas cunter crudada da crappa.
- Rossa: Per l'avertura dal guaud "Sespet" deliberescha la regenza
contribuziuns chantunalas da ca. 290'000 francs.
Contribuziuns chantunalas a differentas instituziuns
- Fond da sport: La regenza deliberescha totalmain 380'000 francs
dal fond da sport. Las contribuziuns van a la federaziun grischuna da
ciclissem per la fundaziun dal team da mountainbike dal Grischun, a
favur da l'onn internaziunal dal sport e da l'educaziun sportiva 2005
per activitads en il Grischun e per l'amplificaziun dal project "SPORT
Kids".
- Contribuziuns culturalas: La regenza approvescha 50'000 francs per
la promoziun da la cultura. Las contribuziuns vegnan concedidas al
circus d'uffants Lollypop ed al teater da figuras Arcas.
- SvizraMobila: Per il project SvizraMobila garantescha la regenza
ina contribuziun totala da 300'000 francs per la durada da tschintg
onns. Il project cuntegna principalmain la signalisaziun e la
commerzialisaziun da rutas da velo e da viandar sco er trajects da
mountainbike, skating e canu en tut la Svizra.
Projects da vias
- Tumein-Trin Mulin: Per sanar la punt dal Lavoitobel approvescha la
regenza 190'000 francs.
- Versomi: La regenza approvescha ca. 170'000 francs per construir
ina fermada da bus cun ina plazza da volver.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun