En preschientscha da cusseglier guvernativ Martin Schmid ha la cumissiun per economia, taxas e politica da stadi (CETPS) predeliberà la revisiun totala da la lescha dal dretg da burgais dal chantun Grischun che vegn tractada en la sessiun d'avust en il cussegl grond.
La revisiun parziala da lescha federala dal dretg da burgais pretenda stringentamain in'adattaziun dal dretg chantunal, particularmain areguard las taxas da natiralisaziun. Cun la revisiun totala da la lescha chantunala dal dretg da burgais duai a medem temp vegnir tegnì quint da las novaziuns da la giurisdicziun ch'èn succedidas dapi l'ultima revisiun parziala sco er da las necessitads actualas en la pratica giuridica.

Ils puncts centrals da la revisiun planisada èn las premissas da qualificaziun, la necessitad da domicil e la durada da domicil, la renatiralisaziun, la renunzia a la perdita legala dal dretg da burgais en cas d'ina natiralisaziun, l'attenziun giuridica en la procedura da natiralisaziun, ils meds legals cunter decisiuns da natiralisaziun e la protecziun da datas.

En moda cuntraversa èn vegnidas discutadas intginas disposiziuns davart il dretg da burgais communal. Ina minoritad da la cumissiun propona che betg pli las vischnancas burgaisas na duain esser cumpetentas per la procedura da natiralisaziun en l'avegnir, mabain las vischnancas politicas. Dentant duai la vischnanca politica avair la pussaivladad da delegar las cumpetenzas correspundentas tranter auter a la vischnanca burgaisa.

Dal rest è la cumissiun suandada per gronda part las propostas da la regenza.

La missiva da la regenza è la finala vegnida deliberada per mauns dal cussegl grond.

Gremi: cumissiun per economia, taxas e politica da stadi
Funtauna: rg cumissiun per economia, taxas e politica da stadi