La criminalitad transcunfinala è daventada pli professiunala ed ils
acts chastiabels en las regiuns da cunfin s'augmentan. La regenza dal
chantun Grischun ed il corp da guardias da cunfin (Cgcf) han decidì da
collavurar en moda anc pli stretga en il territori da cunfin. Sche la
polizia chantunala grischuna ed il Cgcf tiran a niz las sinergias en
moda optimada, è quai la basa per "producir" dapli segirezza cun las
resursas ch'èn avant maun.
La regenza dal chantun Grischun ed il directur general da duana han
sutsegnà ina cunvegna tranter la polizia chantunala grischuna ed il corp
da guardias da cunfin davart la collavuraziun vicendaivla. Cun questa
cunvegna autorisescha il chantun Grischun ils organs da la guardia da
cunfin d'elavurar independentamain tscherts cas polizials en il
territori da cunfin per incarica dal chantun. La cunvegna promova ch'i
vegnan realisadas acziuns communablas e serva sco basa per in sustegn ed
agid vicendaivel nuncumplitgà e svelt, e quai en cas d'eveniments
spezials, per ils quals igl è impurtant e decisiv d'utilisar ils meds en
ina moda svelta ed effizienta che serva a l'intent. Cun simplifitgar ils
andaments e l'utilisaziun da sinergias duain domaduas partidas profitar
da dapli resursas da persunal per exequir lur incumbensas centralas
respectivas.
La collavuraziun concerna principalmain la tschertga da persunas,
d'objects e da vehichels sco er la persecuziun da tscherts delicts
cunter la lescha davart las armas, cunter la lescha da narcotics, cunter
la lescha davart il traffic sin via e cunter il dretg da persunas
estras. Per tscherts cas ha il corp da guardias da cunfin survegnì la
cumpetenza da far denunzias, d'emetter multas disciplinaras e d'incassar
cauziuns. Tras la nova cunvegna vegn la guardia da cunfin svizra a
pudair liquidar en atgna cumpetenza cunzunt formalitads, per las qualas
la polizia stueva vegnir clamada fin uss.
Cunquai ch'ils viadis d'access al cunfin crodan per cas da
bagatella, dispona la polizia chantunala grischuna da dapli persunal per
il provediment polizial da basa. La chargia supplementara che resulta
per il corp da guardias da cunfin vegn cumpensada tras il gudogn da
temp. Uschia vegnan er reducidas considerablamain las duradas dal
tractament al cunfin. Dal puntg da vista finanzial n'ha la realisaziun
da la cunvegna naginas consequenzas per las duas partidas.
Gremi: Regenza
Funtauna: rg chanzlia chantunala