La sessiun d'avust 2005 vegn la regenza a preschentar al cussegl
grond in project davart la nova concepziun dal provediment dal chantun
cun ospitals en il chantun Grischun ed in project davart la nova
concepziun da la plazza d'ospitals da Cuira. La cumissiun permanenta per
sanadad e fatgs socials dal cussegl grond (CSF) ha - sut la direcziun da
Mathis Trepp - tractà e deliberà las duas missivas correspundentas da la
regenza en pliras sedutas per mauns dal cussegl grond. A las sesidas èn
er stads preschents cusseglier guvernativ Martin Schmid sco er
represchentantas e represchentants da l'uffizi da sanadad.
Nova concepziun dal provediment dal chantun cun ospitals
Sco che la regenza scriva en sia missiva, pretenda l'augment dals
custs en il sectur da la sanadad en general ed en il sectur dals
ospitals en spezial ina nova concepziun dal provediment cun ospitals. La
divisiun actuala dals ospitals subvenziunads en quatter stgalims
(provediment da center, provediment da basa extendì, provediment da basa
normal, provediment da basa simpel) duai vegnir remplazzada tras ina
divisiun en dus stgalims (provediment da basa, provediment da center).
Ultra da quai duain ils ospitals survegnir dapli libertads per agir sco
interpresa. In ulteriur punct caracteristic da la missiva è che la
direcziun dal provediment cun ospitals duai succeder - or dal puntg da
vista dal chantun - tras ina differenziaziun da la purschida da
prestaziuns cun dretg da contribuziun dals ospitals. Quai vul dir
concretamain ch'il chantun differenziescha en l'avegnir per mintga
ospital tranter secturs spezials, als quals il chantun conceda
contribuziuns tant per las prestaziuns medicinalas (contribuziuns pro
cas) sco er per ils servetschs da pichet dal sectur staziunar, e tranter
secturs spezials, als quals il chantun conceda unicamain contribuziuns
per las prestaziuns medicinalas.
Davart differents artitgels dal project han las commembras ed ils
commembers da la cumissiun inoltrà propostas da modificaziun. Uschia ha
ina maioritad da la cumissiun fatg la proposta d'integrar la pediatria
en la purschida cun dretg da contribuziun per las prestaziuns
medicinalas e per ils servetschs da pichet dal sectur staziunar da
l'ospital da Glion. Areguard l'integraziun en la purschida cun dretg da
contribuziun per las prestaziuns medicinalas e per ils servetschs da
pichet dal sectur staziunar èn avant maun er duas propostas da
minoritad. Quellas pertutgan d'ina vart l'integraziun da la pediatria en
la purschida cun dretg da contribuziun per ils servetschs da pichet dal
sectur staziunar da l'ospital da Tavau e da l'autra vart l'integraziun
correspundenta da la chirurgia generala e da anestesiologia en l'ospital
da Puschlav.
In'ulteriura proposta da minoritad na vuless betg che la concessiun
da contribuziuns chantunalas als ospitals dependia mo da l'observaziun
da la qualitad da la structura, mabain er da la qualitad dal process e
dal resultat. Ulteriuras propostas da minoritad tematiseschan l'autezza
da las contribuziuns chantunalas a las investiziuns dals ospitals sco er
a las prestaziuns medicinalas ed il dretg da cundecisiun dal chantun en
ils ospitals.
Nova concepziun da la plazza d'ospitals da Cuira
Tenor la missiva da la regenza duai unicamain l'ospital chantunal
dal Grischun a Cuira - che resulta da la fusiun da l'ospital chantunal e
regiunal retic a Cuira e da l'ospital da la crusch a Cuira sco er da
l'integraziun da l'ospital chantunal da dunnas Fontana - avair da nov il
dretg da contribuziuns. La purschida cun dretg da contribuziun cumpiglia
il spectrum da las prestaziuns che vegnan furnidas oz da quels trais
ospitals. Tar quest project èn vegnidas discutadas detagliadamain
oravant tut l'autezza da las contribuziuns chantunalas a las
investiziuns - qua è avant maun ina proposta da maioritad - e l'autezza
da las contribuziuns chantunalas a las prestaziuns medicinalas. Qua n'ha
la proposta d'augmentar la contribuziun betg chattà ina maioritad.
Dal rest è la cumissiun suandada las propostas da la regenza.
In'ulteriura tractanda en la sesida da cumissiun è stada
l'incumbensa da la CSF concernent la cuntinuaziun dal register da cancer
che la regenza propona da refusar.
La cumissiun ha discutà la tematica - cun consultar diversas
expertas e divers experts - anc ina giada detagliadamain. Cun 7 cunter 4
vuschs stat ella tar l'incumbensa da cumissiun e dumonda la regenza da
sclerir, tge cundiziuns che stoppian esser ademplidas per ch'in sustegn
finanzial dal register da cancer tras il chantun vegnia vinavant en
dumonda.
Gremi: cumissiun per sanadad e fatgs socials
Funtauna: rg cumissiun per sanadad e fatgs socials