La regenza grischuna sustegna las stentas da la vischnanca da Domat da domiciliar ina resgia gronda da la firma Holzindustrie Stallinger ScRL, Austria, en il territori "Vial/Tuleu". Perquai ha ella autorisà il schef dal departament da l'intern e da l'economia publica, cusseglier guvernativ Hansjörg Trachsel, da suttascriver - ensemen cun la firma Stallinger sco er cun la vischnanca burgaisa e cun la vischnanca politica da Domat - ina decleraziun d'intenziun correspundenta. Questa decleraziun cuntegna la concessiun chantunala d'in volumen d'investiziun betg rembursabel a la firma Stallinger, in emprest da daners segirà cun in tschains pli favuraivel d'ina durada da diesch onns e la garanzia che l'interpresa vegn liberada da las taglias communalas e chantunalas en il rom da las pussaivladads legalas. Il medem mument prenda la regenza enconuschientscha dal stadi dal project d'investiziun da la firma Stallinger a Domat e dal stadi actual da las elavuraziuns.
Cun il conclus dals 22 da favrer 2005 aveva la regenza examinà il lieu "Wingertli" a Vaz sut en connex cun la domiciliaziun d'ina resgia gronda da la firma Stallinger en il Grischun. Sco uss en il cas da Domat aveva ella suttascrit ina decleraziun d'intenziun cun conceder in volumen d'investiziun betg rembursabel ed in emprest da daners segirà cun in tschains pli favuraivel ed empermess a la firma Stallinger ina liberaziun da la taglia durant in temp limità.
Dal puntg da vista da la regenza duain correspundentamain vegnir sustegnids domadus lieus. Per decider davart il lieu è responsabla en emprima lingia la firma Stallinger.

Gremi: regenza
Funtauna: rg chanzlia chantunala dal Grischun