Approvà la cunvegna cun il salvament alpin da la Svizra
- Seiteninformationen
- Erste Mitteilung
- Neuen Beitrag einfügen
La regenza grischuna ha approvà la cunvegna tranter il chantun Grischun ed il salvament alpin da la Svizra concernent la garanzia dal salvament en las muntognas dal chantun Grischun dals 20 da zercladur 2006 cun la resalva ch'il cussegl grond delibereschia ils credits necessaris. Dapi che la fundaziun dal salvament alpin da la Svizra (SAR) è vegnida fundada ils 24 d'october 2005 datti en Svizra in post central da coordinaziun per il salvament alpin. En questa fundaziun èn s'unids il club alpin svizzer (CAS) e la guardia aviatica svizra da salvament (Rega). La fundaziun s'occupa da la coordinaziun centrala, da la scolaziun, da la communicaziun e da la finanziaziun dal salvament alpin. Las staziuns regiunalas da salvament dal CAS èn dentant anc adina responsablas per far ils salvaments. Il SAS ha cumenzà cun sia activitad operativa il 1. da schaner 2006.
Il chantun Grischun indemnisescha il SAS cun ina pauschala annuala da 200'000 francs. La regenza resguarda il contract per garantir il salvament alpin en il chantun Grischun sco adequat e cunvegnent. Grazia a la fundaziun SAS ha il chantun mo pli ina persuna da contact per tut il salvament alpin. Quai è ina simplificaziun considerabla cumpareglià cun la situaziun d'enfin uss.
Revedì l'ordinaziun davart il curs preparatoric per l'admissiun al studi a la scola auta da pedagogia
La regenza grischuna ha revedì l'ordinaziun davart il curs preparatoric per l'admissiun al studi a la scola auta da pedagogia (ordinaziun davart il curs preparatori a la SAP). Da nov duain tut las absolventas e tut ils absolvents dal curs preparatoric far in examem final en mintga rom. Questa novaziun è stada necessaria per che las cundiziuns da la cumissiun da renconuschientscha possian vegnir ademplidas. L'ordinaziun davart il curs preparatori a la SAP regla ultra da quai il program d'instrucziun sco er la durada dals curs.
Da vischnancas e regiuns
- Tinizong-Rona: A la vischnanca da Tininzong-Rona vegn concedida ina contribuziun da 79'310 francs als custs cun dretg da contribuziun per renovar il provediment d'aua, 2. part.
- San Murezzan: En il vitg da San Murezzan vegn fixada la sveltezza maximala a 30 km/h sin la via Tinus e sin la via Fullun, davent da la via Maistra fin Chantarella, ed i vegn introducida ina "zona da tempo 30".
- Jenins: En il vitg da Jenins vegn fixada la sveltezza maximala a 30 km/h a partir da l'ustaria champestra "zur Bündte", e quai cun integrar la via chantunala. Medemamain vegn introducida ina zona da tempo 30.
- Razén: En il vitg da Razén vegn fixada la sveltezza maximala a 30 km/h. Medemamain vegn introducida ina zona da tempo 30 a partir dal negozi da vischnanca "Denner" fin tar la filiala da la banca Raiffeisen, e quai cun integrar la via chantunala.
- Zuoz: En il vitg da Zuoz vegn fixada la sveltezza maximala a 30 km/h a partir da la Chesa Melcher fin tar la Chesa Mambretti, e quai cun integrar la via chantunala. Medemamain vegn introducida ina zona da tempo 30.
- Trun: En il vitg da Trun vegn extendida la zona da la sveltezza maximala existenta da 50 km/h "limita generala" per circa 195 meters en direcziun da Glion.
- Wiesen: En la vischnanca da Wiesen vegn la part dal vitg "Schluocht" marcada sin la via dal Landwasser sco traject entaifer il vitg ed i vegn introducida ina sveltezza maximala en il vitg da 60 km/h.
- Ardez: La revisiun totala da la planisaziun locala concludida da las votantas e dals votants da la vischnanca dad Ardez a la radunanza communala dals 30 d'avust 2005 vegn approvada cun differentas resalvas e cundiziuns.
- Fideris: La revisiun parziala da la planisaziun locala concludida da las votantas e dals votants da la vischnanca da Fideris a la radunanza communala dals 20 d'october 2005 vegn approvada cun differentas resalvas e cundiziuns.
- Seewis: Il plan da zonas parzial 1:1'000 da la vischnanca da Seewis dals 2 da december 2005 vegn approvà.
- Circul da Churwalden: La constituziun dal circul da Churwalden dals 21 da matg 2006 vegn approvada.
Contribuziuns chantunalas a differentas instituziuns
- Project collectiv "selvicultura 2006": La regenza ha approvà il project collectiv chantunal "selvicultura 2006" che custa totalmain 18'260'000 francs. Ils custs che restan suenter la deducziun dal retgav da la vendita da laina importan 12'190'000 francs. Per realisar il project vegnan permessas contribuziuns chantunalas en l'autezza maximala da 1'763'200 francs. Al project èn participads 199 proprietarias e proprietaris da guaud publics e privats.
- Viafier retica: La regenza conceda a la viafier retica (VR) contribuziuns d'investiziun da 223'500 francs. Ils meds finanzials vegnan duvrads per construir da nov la punt sur il Schraubach a Schiers sco er per reparar il viaduct da la val Susauna tranter S-chanf e Cinous-chel.
- Agid d'investiziun: A la fundaziun svizra per il turissem social vegnan garantids ina contribuziun chantunala da maximalmain 252'509 francs per construir da nov l'albiert da giuventetgna a Scuol sco er in credit d'agid d'investiziun senza tschains dad 1'500'000 francs da la confederaziun.
- Promoziun da la cultura: La regenza grischuna ha concedì contribuziuns da totalmain 119'700 francs per promover 15 occurrenzas ed ovras culturalas.
- "Coscienza Svizzera": Per gidar a finanziar la segunda fasa dal project "tour de Suisse - per un vero federalismo plurilingue" da l'uniun "coscienza Svizzera" vegn pajada ina contribuziun da 20'000 francs.
- Uniun dal chor grischun da giuventetgna: L'uniun dal chor grischun da giuventetgna survegn ina contribuziun al deficit da 7'000 francs per l'onn da gestiun 2006.
Projects da vias
La regenza ha approvà totalmain 3'815'000 francs per construir e per sanar ils suandants trajects da via:
- via naziunala A13: Pian San Giacomo - Malabarba
- via naziunala A13: tunnel "Isla Bella"
- via naziunala A28: punt sur l'aual da Schlappin a Claustra
- via naziunala A28: punt sur il Talbach a Claustra
- via da l'Alvra: sviament da Filisur
- via da Furna
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun
Neuer Artikel