La regenza ha approvà la revisiun da la planisaziun locala da Tavau decidida da las votantas e dals votants communals ils 31 d'october 2004, cun la quala è vegnida creada tranter auter la premissa per construir ina tur da 105 meters autezza sin la Schatzalp, ina tur ch'è destinada per vegnir utilisada sco hotel e per abitaziuns. A medem temp ha la regenza refusà ils recurs da planisaziun ch'èn vegnids inoltrads cunter la tur.

In motiv impurtant per l'approvaziun da la planisaziun da la tur è stà per la regenza l'intenziun manifestada da la vischnanca e dals promoturs da fixar - cun l'ulteriur svilup architectonic da la Schatzalp - a medem temp la basa per mantegnair l'hotel da muntogna marcant e degn da protecziun Schatzalp. In aspect impurtant è stada plinavant l'exclusivitad da la planisaziun preschentada. L'auta qualitad concepziunala ed architectonica incontestabla dal concept d'ina tur ch'è vegnì sviluppà dals architects basilais da renum Herzog & de Meuron è la finala schizunt stada decisiva per acceptar la planisaziun da la vischnanca, malgrà il quità da las recurrentas e dals recurrents - che sto vegnir prendì serius - visavi l'integraziun d'ina tur da 105 meters autezza en la cuntrada muntagnarda. Quai che pertutga l'objecziun, tenor la quala la tur pudess signifitgar in pregiudizi privlus per projects da construcziun analogs en autras regiuns da l'artg alpin, è la regenza da l'avis che questas temas possian vegnir relativadas, sch'ins resguarda l'exclusivitad da la Schatzalp ed il caracter da Tavau sco metropola da las Alps. Abstrahà da quai fa la Schatzalp cleramain part - pertutgant sia funcziun - da la structura da la citad da Tavau; ella è cuntanschibla entaifer ca. 4 minutas cun la funiculara che parta davent da Tavau.

La finala dat la soluziun cun la tur perditga a la regenza - schebain che questa soluziun para fitg spectaculara - d'in tractament creativ cun las cundiziuns exclusivas sin la Schatzalp. Il volumen dal fundament dal monument architectonic existent vegn cumplettà armonicamain cun il corpus da circa medema lunghezza da la tur che vegn a raiver en l'autezza. I vegnan a resultar dus cubus cumpacts, in fatg che duai vegnir preferì cleramain a la moda da construir convenziunala, per exempel en furma d'ina accumulaziun da pliras chasas da vacanzas singulas. Il concept represchenta - ord vista da la regenza - ina cumbinaziun reussida tranter la tradiziun e l'art moderna. Ina tur exprima il caracter da Tavau sco metropola da las Alps e pudess daventar in'ensaina per l'architectura d'hotels alpins moderns.

Per garantir che l'ulteriur svilup architectonic da la substanza architectonica existenta succedia resguardond uschè bain sco pussaivel las valurs da la tgira da monuments e per garantir che l'edifizi nov vegnia effectivamain construì en il senn e en l'idea dal concept avant maun d'ina tur - il concept da Herzog & de Meuron -, ha la regenza integrà cundiziuns adattadas en il conclus d'approvaziun.

Cunter quest conclus d'approvaziun pudess vegnir fatg recurs entaifer 20 dis dapi sia publicaziun, quai vul dir fin ils 28 da favrer 2006, tar la dretgira administrativa dal Grischun. Uschespert che la planisaziun d'utilisaziun ha obtegnì vigur legala, po vegnir iniziada - sin basa dals projects da detagl che ston anc vegnir elavurads - la procedura per la permissiun da construcziun da la vischnanca.

chanzlia chantunala dal Grischun

Gremi: Regenza
Funtauna: rg chanzlia chantunala dal Grischun