La regenza grischuna è da princip d'accord cun ils plans da la
confederaziun per in register public davart l'emissiun da substanzas
nuschaivlas. En l'avegnir duain las infurmaziuns davart l'emissiun da
tschertas substanzas nuschaivlas e davart il transfer da tscherts
ruments esser accessiblas publicamain. A l'obligaziun d'annunzia èn
suttamess var 1000 manaschis gronds e mesauns en Svizra, sch'els emettan
substanzas nuschaivlas che surpassan ina tscherta limita minimala. Tar
questas substanzas nuschaivlas tutgan tranter auter la pulvra fina, il
dioxid carbonic e metals grevs. La confederaziun ha tramess en
consultaziun l'ordinaziun correspundenta davart l'uschenumnà "pollutant
release and transfer register" (register davart l'emissiun e davart il
transfer da substanzas nuschaivlas, PRTR). Uschia realisescha la Svizra
in'obligaziun internaziunala. La finamira a lunga vista è quella da
procurar che questas emissiuns a l'ambient vegnian reducidas.
Quant enavant ch'il PRTR possia esser in agid per quai, na sa
laschia betg giuditgar, scriva la regenza en sia resposta da
consultaziun a la confederaziun, cunquai ch'i na saja betg enconuschent,
tge part da las substanzas nuschaivlas effectivamain emessas che vegn
insumma registrada en il PRTR. Pervia da quai dastgass in tal register
avair in niz limità en la publicitad. En in rom pli grond pudess quest
register dentant esser in bun instrument per cumprovar regiuns cun
grondas grevezzas per l'ambient. La regenza parta dal fatg che main che
diesch manaschis grischuns fissan suttamess a l'obligaziun d'annunzia.
Ils manaschis pertutgads - cun excepziun da singuls stabiliments per
dismetter ils ruments - vegnan per regla gia ad avair a disposiziun las
datas. Per ils manaschis na duessi perquai betg dar gronds custs,
menziunescha la regenza.
Approvà ina nova cunvegna da contribuziun cun la pro senectute
La regenza grischuna ha approvà ina nova cunvegna da contribuziun
tranter il chantun Grischun e la pro senectute dal Grischun. La nova
incarica da prestaziuns vala per ils onns 2006 fin 2009. En
cumparegliaziun cun il contract da prestaziuns da l'onn 2002 èn - ultra
d'adattaziuns formalas - vegnidas midadas cunzunt las prestaziuns che la
pro senectute sto furnir e l'indemnisaziun da questas prestaziuns. Las
prestaziuns che la pro senectute furnescha en ils secturs dals fatgs
socials, dal sport, da la furmaziun, dals servetschs, da la communitad e
da l'infurmaziun vegnan indemnisadas dal chantun cun ina pauschala da
totalmain 105'000 francs. Da nov vegnan indemnisadas las prestaziuns
socialas da la pro senectute ultra da quai cun maximalmain 100'000
francs, e quai s'orientond a la prestaziun. L'autezza da questa
indemnisaziun che dependa da la prestaziun è vegnida calculada uschia
ch'i vegniss pajà a la pro senectute circa la medema contribuziun
chantunala sco l'onn precedent, sch'il dumber da cussegliaziuns resta il
medem sco l'onn 2005.
Da vischnancas e regiuns
- Sevgein: Per mesiras per renovar e per cumplettar il stabiliment
dal provediment d'aua, 1. e 2. etappa, vegn garantida a la vischnanca da
Sevgein ina contribuziun pauschala dad 85'400 francs als custs cun dretg
da contribuziun.
- Corporaziun regiunala dal Grischun dal nord: La regenza ha appovà
ils statuts da la corporaziun regiunala dal Grischun dal nord. Ils
statuts entran en vigur il 1. da schaner 2007.
- Parpan: La revisiun parziala da la constituziun communala da la
vischnanca da Parpan, ch'è vegnida concludida da la radunanza communala
ils 4 da november 2004, vegn approvada.
Contribuziuns chantunalas a differentas instituziuns
- Promoziun da la cultura: La regenza grischuna ha concedì
contribuziuns da totalmain 170'500 francs per promover 13 occurrenzas ed
ovras culturalas.
- Scola da judo da Glion: Per cumprar matratschas da judo e
different material da judo survegn la scola da judo da Glion ina
contribuziun or dal fond da sport da maximalmain 6'100 francs.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun