Inspecturas ed inspecturs da lavur da tut la Svizra sa scuntran gievgia, ils 7 da settember 2006, a Tavau, e quai en il rom da la conferenza d'atun annuala da l'associaziun interchantunala per la protecziun da las lavurantas e dals lavurants (AIPL). Questa dieta vegn organisada da l'uffizi per industria, mastergn e lavur dal chantun Grischun. Spetgadas vegnan circa 115 persunas da tut ils chantuns. Sco giasts vegnan a sa participar il president da la regenza Claudio Lardi e la presidenta da vischnanca da Tavau, Elisabeth Mani-Heldstab.
La AIPL è la federaziun tetgala da tut ils inspecturats chantunals da lavur sco er da l'inspecturat da lavur dal principadi da Liechtenstein. La AIPL è ina plattafurma per barattar experientschas en il sectur da la segirezza da lavur e da la promoziun da la sanadad sco er da las cundiziuns da lavur. La federaziun tetgala contribuescha en moda activa a la coordinaziun dals problems che han in connex cun la segirezza e cun la sanadad a la plazza da lavur en Svizra. Er tar auters secturs e tar autras organisaziuns ch'èn fitg parentads a quests secturs, coordinescha la AIPL regularmain sias activitads e la scolaziun. Per quest intent ha la AIPL trais commembras u commembers en la cumissiun federala da coordinaziun per la segirezza a la plazza da lavur (CFSL). La collavuraziun tranter la AIPL e l'uniun svizra dals uffizis da lavur (USUL) è vegnida rinforzada. Quai sa mussa en spezial tar la realisaziun da mesiras accumpagnantas che han da far cun la libra circulaziun da persunas.
La conferenza d'atun da la AIPL cumenza las 13.30 en il "Arabella Sheraton Hotel Derby" a Tavau. Suenter il bainvegni tras Marc-André Tudisco, president da la AIPL, sco er tras Paul Schwendener, schef da l'uffizi per industria, mastergn e lavur dal chantun Grischun, stattan sin il program in referat ed ina discussiun davart il tema "pretensiuns ed exigenzas ad ina inspecziun da lavur dal XXIavel tschientaner". Sco referent discurra Wolfgang Freiherr von Richthofen, international consultant on labour inspection/protection. Il segund referat che vegn salvà da Serge Gaillard da l'uniun sindicala da la Svizra (USS), porta il titel "Tranter bunas cundiziuns da lavur e la creschientscha economica na datti nagins conflicts areguard las finamiras". La conferenza dura fin las 16.15.

Gremi: uffizi per industria, mastergn e lavur
Funtauna: rg uffizi per industria, mastergn e lavur