La cunvegna tranter il chantun Grischun ed il salvament alpin
svizzer concernent la garanzia dal salvament en las muntognas dal
chantun Grischun vegn sutsegnada uffizialmain gievgia, ils 7 da
settember 2006, a St. Antönien. Cun ina visita communabla da la senda da
raiver Sulzfluh a St. Antönien tras il schef dal departament da giustia,
polizia e sanitad, cusseglier guvernativ Martin Schmid, sco er tras
represchentants dal departament, dal salvament alpin svizzer e dal
chantun Grischun vegn mess in accent simbolic sin la gronda impurtanza
dal salvament e sin il sustegn da quel tras il chantun.
La fin da zercladur ha la regenza grischuna approvà la cunvegna
tranter il chantun Grischun ed il salvament alpin svizzer concernent la
garanzia dal salvament en las muntognas dal chantun Grischun. La
cunvegna vegn sutsegnada gievgia, ils 7 da settember, en l'ustaria
Sulzfluh a St. Antönien. Cun la suttascripziun formala dal contract tras
il cusseglier guvernativ Martin Schmid e tras il cussegl da fundaziun
dal salvament alpin svizzer èn vegnidas meglieradas considerablamain las
premissas per las staziuns da salvament dal club alpin svizzer (CAS) en
il chantun Grischun. Cun il sustegn finanzial dal chantun Grischun al
salvament alpin svizzer en la dimensiun da 200'000 francs per onn pon la
prontezza a l'acziun e la scolaziun da las forzas da salvament vegnir
garantidas a pli lunga vista ed en la furma d'in servetsch public per
l'entir chantun.
Avant che sutsegnar ils contracts visitan ils represchentants da las
partidas contrahentas, cusseglier guvernativ Martin Schmid, schef da
l'uffizi da sanadad dal Grischun Rudolf Leuthold, mainafatschenta e guid
da muntogna dal salvament alpin svizzer Andres Bardill, president dal
salvament alpin svizzer Geni Suter, la senda da raiver Sulzfluh a St.
Antönien. Uschia expriman tut ils participants lur voluntad da
s'engaschar per in salvament alpin ferm che va en favur dals umans ch'èn
vegnids en privel en las muntognas.
Cun sia extensiun cumpiglia il Grischun bunamain in quart da l'entir
sectur d'acziun dal salvament alpin svizzer ch'è responsabel - sco
fundaziun dal CAS e da la REGA - dapi il schaner 2006 per coordinar la
prontezza a l'acziun e la scolaziun da las forzas da salvament da
l'entira Svizra, danor dal chantun Vallais.
Las nov secziuns grischunas dal club alpin svizzer CAS (Arosa,
Bernina, Bergiaglia, Tavau, Engiadina bassa, Piz Platta, Piz Terri,
Partenz e Rezia) èn reunidas en ina uniun sut il num "Salvament Alpin
Grischun - Alpine Rettung Graubünden - Soccorso Alpino Grigioni". Il
salvament alpin grischun ha l'intent da promover e da coordinar il
salvament en il chantun Grischun sco er la collavuraziun tranter las
staziuns da salvament da las secziuns commembras. Quellas mainan
actualmain 33 staziuns da salvament en il chantun Grischun. Da questas
staziuns fan part bunamain 800 forzas da salvament bain scoladas e
cumplettamain equipadas sco er equipas ch'èn prontas a l'acziun e che
disponan da chauns per la retschertga il terren e da chauns da lavinas.
Il salvament or da l'aria daventa bain pli e pli impurtant, ma il
salvament terrester en territoris maltransibels - che succeda en
l'entira Svizra anc adina tras il CAS e tras sias organisaziuns
partenarias - ha ina fitg gronda impurtanza cunzunt er en situaziuns
extraordinarias ch'èn vegnidas chaschunadas d'eveniments gronds u
perquai ch'i smanatschan adina dapli privels da la natira.
Gremi: departament da giustia, polizia e sanitad dal Grischun
Funtauna: rg departament da giustia, polizia e sanitad dal Grischun