La regenza grischuna beneventa l'intenziun da la confederaziun
d'adattar l'ordinaziun davart la reducziun da las ristgas cun substanzas
chemicas (ORRChem) a las disposiziuns da la UE. L'ordinaziun davart la
reducziun da las ristgas cun substanzas chemicas cuntegna restricziuns e
scumonds per totalmain 31 substanzas e gruppas da products. Dapi che
l'ordinaziun è entrada en vigur l'avust 2005, èn vegnidas midadas
differentas cundiziuns generalas per consegnar tschertas substanzas
chemicas. Per ch'i na resultian nagins novs impediments per il commerzi,
duain vegnir adattadas las disposiziuns svizras a quellas da la UE.
Sco quai che la regenza scriva en sia resposta da consultaziun,
beneventa ella questa intenziun. Medemamain sustegna ella las
restricziuns ch'èn previsas da nov per tschertas substanzas, sco p.ex.
per il toluol, e las pretensiuns pli severas a las limitas tar ils ielis
plastifitgants che vegnan duvrads per producir pneus. Percunter n'è la
regenza betg d'accord che differents scumonds duain vegnir abolids per
utilisar metals grevs tar materials da fabricaziun e tar elements da
construcziun per vehichels e per apparats electrics. I saja bain
chapibel ch'ins veglia evitar custs da midada a l'industria. Quai haja
dentant l'effect secundar che tscherts materials da fabricaziun e che
tscherts elements da construcziun vegnian producids en moda pli
nuschaivla per l'ambient che quai ch'igl è necessari.
L'inspecturat da vischnancas ha num ussa uffizi da vischnancas
L'inspecturat da vischnancas survegn in nov num: uffizi da
vischnancas. Quai ha concludì la regenza grischuna. En il rom da la nova
regulaziun da l'organisaziun da la regenza e da l'administraziun mida
l'inspecturat da vischnancas per il 1. da schaner 2007 dal departament
da l'intern e da l'economia publica al departament da finanzas e
vischnancas.
Da vischnancas e regiuns
- Valendau: A la vischnanca da Valendau vegn garantida ina
contribuziun da 145'600 francs als custs cun dretg da contribuziun per
renovar e per engrondir il stabiliment dal provediment d'aua da Dutg, 1.
e 2. etappa da construcziun.
- Cumbel: La revisiun parziala da la planisaziun locala da la
vischnanca da Cumbel, concludida ils 19 da matg 2006, vegn approvada cun
ina cundiziun.
- Brusio: La revisiun parziala da la planisaziun locala da la
vischnanca da Brusio dals 16 e dals 22 da december 2005 vegn approvada
cun ina cundiziun.
- Puschlav: La revisiun parziala da la lescha da taglia da la
vischnanca da Puschlav dals 27 da november 2005 vegn approvada.
Contribuziuns chantunalas a differentas instituziuns
- Lottaria naziunala: La regenza ha approvà circa 408'000 francs da
la lottaria naziunala per intents culturals. En quest connex vegnan
resguardadas 72 instituziuns.
- Agids d'investiziun: A las telefericas Spleia-Tambo SA vegnan
garantids ina contribuziun chantunala da maximalmain 62'286 francs per
engrondir l'indriz d'ennavar da l'alp Tambo sco er in credit d'agid
d'investiziun senza tschains da 370'000 francs da la confederaziun.
Projects da vias
La regenza ha approvà totalmain 2'400'000 francs per construir e per
sanar ils suandants trajects da via:
- via da l'Engiadina e via dal Malögia: punt da l'En a Samedan
- via dal Schin: val da Cugniel - val da Casel
- via naziunala A13: rampa d'access Rofla
Chaussas persunalas
- Andreas Cabalzar-Schellenberg, domicilià a Tumein, è vegnì nominà
sco manader da la partiziun "natira e cuntrada" tar l'uffizi per la
natira e l'ambient.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun