En diesch dis cumenza a Flem Laax Falera la sessiun d'atun da las chombras federalas. Gist perquai che la sessiun è in'occurrenza politica d'emprim rang vegn la regenza grischuna a profitar da l'occasiun per posiziunar il chantun Grischun en il contact cun las parlamentarias e cun ils parlamentaris sco chantun innovativ. Il Grischun s'allegra da la visita dal parlament federal e dal barat d'opiniuns politicas. Las lavurs preparatoricas da l'organisaziun chantunala dal project avanzan tenor il plan da termins e van en la fasa finala.
Las commembras ed ils commembers da las chombras federalas vegnan en emprima lingia en il Grischun per far lur lavur parlamentara. En quest connex duai star a disposiziun ad ellas ed ad els - sco a Berna - ina infrastructura professiunala, ma er ina purschida da temp liber attractiva. Per la regenza grischuna è la sessiun che cumenza en diesch dis in'occurrenza politica d'emprim rang cun in'aura turistica correspundenta e betg in event turistic cun in'aura politica. Las occurrenzas accumpagnantas uffizialas ch'èn vegnidas fatgas giu cun la direcziun dal parlament federal e che tegnan quint dals basegns da lavur han lieu mo en in dumber limità. Ellas duain servir a mussar a las parlamentarias ed als parlamentaris il chantun Grischun e pussibilitar contacts reals ed autentics cun la lingua e cun la populaziun rumantscha.
Per la sessiun lavuran il chantun Grischun, la regiun Surselva e las vischnancas da Flem Laax Falera cun partenarias e cun partenaris da la branscha turistica. En vista a lur engaschament èsi absolutamain legitim che la sessiun pussibilitescha ad ellas ed ad els d'avair ina valur agiuntada adequata u da far reclama per lur intents. La sessiun en il Grischun n'è ni in'occurrenza da marketing ni in event da luxus. Anzi, la sessiun duai dar a las parlamentarias ed als parlamentaris la pussaivladad d'emprender ad enconuscher er las varts bellas ed agreablas dal Grischun. Il chantun Grischun posseda ina cumpetenza turistica centrala ch'el vuless preschentar sco ospitant cordial.

Il Grischun vul sa posiziunar politicamain
Gist perquai che la sessiun è in'occurrenza politica d'emprim rang vegn la regenza a posiziunar il chantun Grischun er politicamain en il contact cun las parlamentarias e cun ils parlamentaris. Il chantun Grischun s'allegra da la visita dal parlament federal, da discussiuns engaschadas e dal barat d'opiniuns politicas. En quest connex stattan sut squitsch il territori alpin e cun el il chantun Grischun sco chantun muntagnard. Ils chantuns muntagnards sa ston far valair en ina discussiun che vegn per part manada cun vehemenza e cumprovar ch'els n'èn - or dal puntg da vista economic - ni territoris che n'èn betg abels dad exister ni - or dal puntg da vista ecologic - in model antiquà. La regenza vuless profitar da l'occasiun e mussar al parlament ch'il Grischun n'è nagina "alp nunproductiva", anzi, ch'el va cun confidenza vers l'avegnir. Il chantun viva e surviva d'ina vart grazia a la ferma voluntad d'exister e grazia a blera atgna iniziativa per meglierar las cundiziuns da viver sco er - da l'autra vart - da la solidaritad giustifitgada dals auters chantuns, da las aglomeraziuns e da las citads.
En quest connex mussa il Grischun ch'el è innovativ, curaschus e visiunar. Il chantun mantegna ed engrondescha ina rait d'infrastructuras che serva - en il sectur dal traffic public e privat - ad interess naziunals ed internaziunals, che porscha recreaziun ed eveniments da gronda valur a persunas che tschertgan quai e ch'è pront da far - grazia a la porta alpina - er pass nunconvenziunals vers il futur. Bleras firmas privatas èn prontas d'investir en quest chantun. Ellas derasan in'atmosfera da partenza e mussan cleramain ch'i dat - ultra dals gronds centers economics da quest pajais - en mintga cas er centers economics regiunals che han confidenza en il svilup futur.

Lavurs preliminaras intensivas a Flem ed in regal da bainvegni
En moda intensiva lavura er Flem sco vischnanca ospitanta londervi da garantir a las parlamentarias ed als parlamentaris cundiziuns da lavur optimalas per l'andament da la sessiun. La populaziun e las autoritads da la vischnanca ospitanta n'han temì nagina lavur dapi che la decisiun per la sessiun extra muros è vegnida prendida. Flem è vegnì ornà e decorà e la populaziun è sa preparada cun bler engaschament persunal per la sessiun. Las autoritads communalas han fixà ils termins da tscherts projects uschia che las participantas e ch'ils participants da la sessiun possian profitar da quests projects. Uschia è la plattafurma "Il spir" (rumantsch per "Mauersegler") cun la vista unica en la chavorgia dal Rain vegnida realisada a temp. Gist per il cumenzament da la sessiun ha la vischnanca ultra da quai edì in cudesch che vegn surdà a tut las participantas ed a tut ils participants da la sessiun sco regal da bainvegni. Quest cudesch ch'il caricaturist renumà Hans Moser ha illustrà preschenta il vitg en ina moda viva e divertenta.
In ulteriur regal da bainvegni en furma da cudesch è l'ovra "Il Grischun tranter integraziun ed isolaziun" da Martin Bundi e da Christian Rathgeb. L'istoricher ed anteriur president dal cussegl naziunal Bundi ed il giurist e deputà Rathgeb valiteschan il svilup il pli nov da la constituziun e las relaziuns externas dal chantun Grischun. Quest cudesch ch'è cumparì tar la chasa editura Südostschweiz Buchverlag dat a las parlamentarias ed als parlamentaris - en furma concentrada - ina invista interessanta da l'istorgia da la constituziun e da la realitad constituziunala.

Las lavurs preparatoricas sa chattan sin ils ultims meters
Las lavurs preparatoricas per la sessiun d'ordaifer progredeschan cun bler schlantsch e sa chattan sin ils ultims meters. En ils secturs da l'infrastructura, da la logistica, da las segirezza e dal program accumpagnant sa sviluppan las lavurs tenor plan da termins. Ils custs actuals sa chattan circa 355'000 francs sur la calculaziun approximativa dal zercladur 2005. Quella giada aveva l'organisaziun chantunala dal project budgetà circa 1,5 milliuns francs cun ina part da circa 0,5 milliuns francs per il chantun Grischun. Ils motivs per ils custs pli auts èn en spezial las expensas supplementaras per il center da visita sco er per las occurrenzas dal program accumpagnant, cunzunt per la festa da finiziun cun ina vasta participaziun da la populaziun al lai da Laax. Quests custs supplementars vegnan dentant finanziads da contribuziuns da sponsurs e da las vischnancas. Las expensas dal chantun Grischun per la sessiun restan èn il rom previs oriundamain.
Nagins problems na chaschuna la stretga collavuraziun cun la confederaziun. Il cumenzament da settember han las commembras ed ils commembers dal parlament survegnì las emprimas invitaziuns per il program accumpagnant che vegn organisà cun agid da purschidras e da purschiders regiunals. Per visitadras e per visitaders è cumparì la fin d'avust la broschura "Bun da savair" che cuntegna infurmaziuns impurtantas ed interessantas davart la sessiun d'ordaifer. En quella vegn er preschentà pli detagliadamain il center da visita ch'è il lieu da scuntrada e da divertiment per visitadras e per visitaders. La populaziun da Flem e da la Surselva survegn ultra da quai la pussaivladad da persequitar directamain a la televisiun las debattas da las chombras federalas, e quai sur il chanal d'infurmaziun "alpenarena news".
Plinavant planisescha l'organisaziun dal project in'acziun speziala per ingiantar ils pults da las cusseglieras naziunalas e dals cussegliers naziunals. Ils retgavs vegnan dads ad ina instituziun da beneficenza. Las parlamentaras ed ils parlamentaris vegnan envidads ils 18 da settember - avant il cumenzament da la sessiun - ad ina marenda d'avertura. Quella vegn concepida e realisada da la swiss school of tourism and hospitality (SSTH) da Passugg e da Cuira e cumpiglia delicatessas da tut il mund. Ultra da quai è planisà in act da finiziun simbolic. Ses cuntegn n'è anc betg fixà.


Gremi: regenza
Funtauna: rg chanzlia chantunala