Per proteger las nunfimadras ed ils nunfimaders cunter il fimar passiv duai il fimar vegnir scumandà en il Grischun en localitads serradas ch'èn accessiblas al public. En il senn d'ina excepziun duai esser pussaivel da fimar mo pli en localitads separadas per fimadras e per fimaders. Quai prevesa il sboz da la revisiun parziala da la lescha da sanadad che la regenza grischuna ha dà en consultaziun.
Il fimar passiv è en differents reguards in privel per la sanadad. Fin oz mancan sin plaun chantunal las disposiziuns legalas che protegian la populaziun cunter il fimar passiv. Cun la revisiun parziala da la lescha da sanadad qua avant maun duai questa largia vegnir serrada ussa.
I duai vegnir scumandà da fimar en localitads serradas ch'èn accessiblas al public, quai vul dir er en manaschis da restauraziun e d'hotellaria, sch'i na vegn betg fimà là en localitads separadas per fimadras e per fimaders. In scumond da fimar concepì en questa moda considerescha la regenza sco admissibel e sco proporziunà. Perquai che la protecziun cunter il fimar passiv po vegnir garantida cun localitads separadas per fimadras e per fimaders sco er per nunfimadras e per nunfimaders u cun plazzas per fimadras e per fimaders or en il liber, fiss in scumond da fimar cumplet sproporziunà. Ina soluziun efficazia per proteger las nunfimadras ed ils nunfimaders cunter il fimar passiv en localitads serradas ch'èn accessiblas al public è da crear respectivamain da zavrar localitads separadas, nua ch'igl è - cuntrari a las ulteriuras localitads - permess da fimar.
A l'intern ed a l'extern da scolas e da stabiliments da sport sco er da lieus da scuntrada e d'instituziuns da tgira per uffants e per giuvenils duai il fimar vegnir scumandà en general per motivs da la prevenziun. Quest scumond da fimar po vegnir abolì da las vischnancas mo excepziunalmain per occurrenzas che sa drizzan per gronda part a persunas creschidas, sch'i vegn fimà en localitads separadas u en lieus definids a l'extern.
La revisiun parziala cuntegna plinavant ulteriuras novaziuns e precisaziuns da la pratica actuala. Uschia duain las relaziuns, sut las qualas las medias ed ils medis che n'han betg la permissiun vegnan autorisads da manar in'apoteca privata e da consegnar medicaments vegnir descrittas da nov ed en moda ch'ellas pon vegnir exequidas. Cun quai duai pudair vegnir controllada la vendita da medicaments tras las medias e tras ils medis cun ina lavur administrativa che po vegnir giustifitgada. En la revisiun parziala da la lescha da sanadad vegn plinavant introducida in'obligaziun d'accoglientscha er per ils ospitals privats che s'obligheschan - sco ils ospitals publics - d'acceptar pazientas e pazients malsauns e disgraziads er senza l'enviament tras ina media u tras in medi. En il senn d'in tractament egual cun ils ospitals privats e cun las clinicas privatas duain la finala ils ospitals publics er vegnir suttamess ad in'obligaziun da dumandar ina permissiun.
Ils documents da consultaziun pon vegnir consultads en l'internet sut www.jpsd.gr.ch. La consultaziun dura fin ils 15 da november 2006.

Da vischnancas e regiuns
- Domat: Il project per la via da guaud da Ranasca da la vischnanca da Domat vegn approvà.
- Avras: Il plan da zonas e plan general da furmaziun 1:1'000 "Cröt" da la vischnanca dad Avras dals 2 da zercladur 2006 vegn approvà.

Contribuziuns chantunalas a differentas instituziuns
- Societad da musica da la Tumleastga dadens: A la societad da musica da la Tumleastga dadens vegn concedida ina contribuziun da maximalmain 9'000 francs per unifurmas novas.

Projects da vias
La regenza ha approvà totalmain 7'972'000 francs per construir e per sanar ils suandants trajects da via:
- A13 via naziunala: midada da construcziun tar la colliaziun da Zizers
- A13 via naziunala: sanaziun cunter la canera Cuira nord
- A13 Soazza - La Punt, A28 Landquart - Claustra/Selfranga, via sursilvana: divers tunnels (installaziuns electricas)
- via sursilvana: sviament da Flem
- via sursilvana da la vart dretga dal Rain: Panaduz - Glion, punt tar il vallun da Carrera

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun