Il selvicultur chantunal Andrea Florin è ì en pensiun. Per la fin d'avust ha Andrea Florin realisà ses giavisch dad ir anticipadamain en pensiun. El ha fatg quai, suenter ch'el era vegnì elegì da la regenza dal chantun Grischun l'onn 1985 sco inspectur forestal. Inspectur forestal - selvicultur chantunal - schef da l'uffizi forestal: co ch'el vegniva titulà, n'era betg uschè impurtant per el. Pli impurtanta per el era l'obligaziun. L'obligaziun da cunvegnas, ma er d'ordinaziuns, talas ch'el retschaveva e talas ch'el deva vinavant.
Sco emprim selvicultur dal Grischun ha sia activitad gì lieu durant in temp, nua ch'ins discurriva da la mort dal guaud, nua che la protecziun e l'utilisaziun dal guaud tschertgavan la ballantscha, ma er nua che structuras d'organisaziun tradiziunalas han cuntanschì lur cunfins. Andrea Florin ha chapì il guaud sco donaziun e sco incumbensa. Sco quai ch'il guaud viva senza canera ed intermediescha la fidanza en il futur, ha il selvicultur chantunal ademplì sia incumbensa en moda vardaivla e solida. Betg quai che porta success a curta vista, mabain quai che vegn a servir als umans futurs è la valur dal guaud - quai era sia tenuta envers il guaud. Per el era il niz cun responsabladad ina finamira gist uschè impurtanta sco dapli effizienza en l'economia forestala. Sche Andrea Florin deplorescha oz che la politica federala tralascha pli e pli il guaud, exprima el ses quità per quai che capita, sche noss guauds èn vegls e na pon betg pli ademplir lur funcziun da protecziun.
Andrea Florin n'è mai ì ord pes a novaziuns, sche quellas sa mussavan sco prospectivas e purtavan schanzas per il guaud grischun. Sch'in tira e sche l'auter stauscha, sa storscha il plat da la resgia. Per in tagl net stoi vegnir tratg en moda bain coordinada e vicendaivla. Igl ha dà er situaziuns difficilas, sco la nova organisaziun dal servetsch forestal chantunal, nua ch'il plat da la resgia è er sa sturschì ina giada. Cun ses far e demanar gentil, ma er segir en chaussa, èsi reussì ad Andrea Florin da dumagnar er talas situaziuns. A ses successur Reto Hefti surdat el ina incumbensa che sa basa sin la cuntinuitad e che pretenda perseveranza. Durant ils ultims 20 onns ha Andrea Florin stgaffì bleras premissas per ch'il guaud grischun haja in bun avegnir. Per ses merits per il guaud grischun e per avair manà il servetsch forestal chantunal al engraziel jau. Jau al poss cuir, sch'el na sto - sin ina da sias spassegiadas tras il guaud cun sia dunna, cun sias biadias e cun ses biadis - betg pli s'occupar da finamiras da prestaziun, dad indicaturs e da directivas dal preventiv, mabain po giudair la fauna e la flora dal guaud.

Cusseglier guvernativ Stefan Engler, schef dal departament da construcziun, traffic e selvicultura dal Grischun

Gremi: departament da construcziun, traffic e selvicultura
Funtauna: rg departament da construcziun, traffic e selvicultura