Per ils donns da malaura da l'avust 2005 ha la chadaina da fortuna svizra mess a disposiziun per il mument al chantun Grischun daners da donaziun en la dimensiun da 3 milliuns francs or da la collecta naziunala. Quests meds finanzials èn destinads per las vischnancas e per las corporaziuns da dretg public ch'èn stadas pertutgadas da las malauras.
Avant che quests daners han pudì vegnir pajads al chantun, ha la chadaina da fortuna svizra stuì procurar l'emprim en tut ils chantuns pertutgads per ina survista generala dals donns e dals custs da las mesiras da reparaziun. En il chantun Grischun importan ils custs restants da las vischnancas ch'èn stadas pertutgadas da donns da malaura, vul dir ils custs restants ch'èn decisivs per reparter las donaziuns, circa 9 milliuns francs.
La cumissiun chantunala per las malauras da l'avust 2005 ha pajà l'entira summa da donaziuns da 3 milliuns francs a totalmain 21 vischnancas pertutgadas. En quest connex ha ella resguardà la capacitad finanziala, donaziuns directas gia retschettas, sco er la grevezza da donns da las vischnancas respectivas.
Ils custs restants ils pli gronds èn vegnids registrads tar las vischnancas dal Partenz davos (Claustra-Serneus, St. Antönien, Schiers e Seewis) sco er a St. Peter, a Langwies, a Bravuogn ed a Susch.

Gremi: departament da construcziun, traffic e selvicultura
Funtauna: rg departament da construcziun, traffic e selvicultura