Il chantun Grischun sa participescha a l'uniun "post da controlla da
la lavur dal Grischun" ch'ins è londervi a fundar. Quai ha concludì la
regenza grischuna. Fundada vegn l'uniun da las partenarias e dals
partenaris socials da l'industria principala da construcziun e da
l'industria secundara da construcziun. La finamira è da rinforzar las
incumbensas da controlla tar las mesiras accumpagnantas en l'industria
principala da construcziun ed en l'industria secundara da construcziun.
Cun introducir la cunvegna davart la libra circulaziun da persunas cun
la UE è vegnida messa en vigur la lescha federala davart las cundiziuns
minimalas da lavur e da paja per lavurantas e lavurants tramess en
Svizra e mesiras accumpagnantas. Uschia duai per exempel vegnir evità
d'ina vart ch'i dettia in dumping da salari sin il martgà da lavur
indigen. Da l'autra vart vegnan interpresas estras ch'èn activas en noss
pajais obligadas d'observar las cundiziuns da lavur e da salari
vertentas localas e da la professiun.
La commembranza dal chantun vegn liada vi da la cundiziun che
l'uniun "post da controlla da la lavur" dal Grischun fetschia lavurs da
controlla per il chantun, e quai en la dimensiun da 50 pertschient da
sia capacitad da prestaziun. La delegaziun da las incumbensas da
controlla ad in organ cuminaivel pussibilitescha - en spezial tar
controllas da plazzals - ina moda e maniera da lavurar fitg effizienta.
La persuna da controlla da l'uniun na po - cuntrari a la cumissiun
paritetica - betg mo controllar singulas branschas, mabain tut las
branschas che fan part da l'uniun. I vegn fatg quint cun custs totals da
260'000 francs. Sch'il chantun sa participescha en la dimensiun da 50
pertschient sto el surpigliar 130'000 francs.
Da vischnancas e regiuns
- San Murezzan: La revisiun parziala da la planisaziun locala da la
vischnanca da San Murezzan dals 5 da zercladur 2005 vegn approvada.
- Partenz: Las lavurs da reparaziun da las malauras 2005, regiun
Partenz sin il territori da las vischnancas da Grüsch, dad Igis, da
Küblis, da Schiers e da St. Antönien vegnan approvadas. Per las lavurs
da reparaziun vegn concedida ina contribuziun chantunala da 430'000
francs.
Contribuziuns chantunalas a differentas instituziuns
- Via Valtellina: A l'uniun per la promoziun da la via Valtellina
vegn garantida per il project da regio plus "via Valtellina" ina
contribuziun da totalmain 100'000 francs per la perioda dals onns 2006
fin 2008.
Chaussas persunalas
- Robert Müller, domicilià a Farschno, è vegnì nominà sco schef dal
district 5 da l'uffizi da construcziun bassa dal Grischun a Tavau.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun