La regenza vegn a suttametter al cussegl grond en la sessiun d'october 2006 la missiva davart la revisiun parziala da la lescha chantunala da taglia. Sut il presidi dad Aldo Tuor ha la cumissiun per economia e taxas (CET) predeliberà la missiva per mauns dal cussegl grond. Fatg part da las sesidas ha er dunna cussegliera guvernativa Eveline Widmer-Schlumpf.
Sco quai che la regenza scriva en sia missiva ha la situaziun finanziala critica dal chantun Grischun bloccà durant lung temp refurmas pli grondas en il dretg fiscal. Uschia ha il chantun pers in pau da sia cumpetitivitad tant en il sectur da las persunas natiralas sco er tar las persunas giuridicas. En il rapport davart ina revisiun da la lescha chantunala da taglia per mauns dal cussegl aveva la regenza preschentà il zercladur 2005 - sin basa da differentas intervenziuns parlamentaras - il basegn d'agir concret sco er differents puncts da revisiun. En la sessiun d'october 2005 aveva il cussegl grond discutà intensivamain il rapport e prescrit a la regenza las finamiras per la revisiun da la lescha ch'è ussa avant maun. Ils puncts principals da la revisiun èn distgargias fiscalas per las persunas giuridicas, per ils conjugals e per las famiglias, la liberaziun da la taglia sin l'ierta per la descendenza directa e l'aboliziun da la taxa speziala sin la facultad.
La CET è sa fatschentada detagliadamain cun il project. Suenter ch'igl è stà incontestà d'entrar en chaussa, èn vegnidas fatgas propostas da maioritad resp. da minoritad tar singulas disposiziuns. Uschia propona ina minoritad da la cumissiun d'introducir ina deducziun sociala per pajataglias che tgiran persunas che basegnan tgira en la medema chasada. Concernent la taxaziun da cumpensaziuns en chapital che provegnan da la prevenziun propona ina maioritad da la cumissiun da reducir la grevezza maximala pli fitg che quai ch'i vegn proponì en la missiva, numnadamain da 3,2 pertschient a 2,6 pertschient per conjugals e da 5 pertschient a 4 pertschient per las ulteriuras pajataglias e per ils ulteriurs pajataglias. Quai duai intimar persunas bainstantas da prender domicil en il Grischun. Tar la taglia sin il gudogn da las persunas giuridicas fa ina maioritad da la cumissiun la proposta da fixar la tariffa da taglia maximala sin 7 pertschient, e betg sin 7,5 pertschient sco quai che la regenza propona. Per promover che la taxaziun d'iertas anticipadas - che sto vegnir pajada il mument da l'entrada en vigur da la revisiun parziala da la lescha da taglia - vegnia pajada a temp, propona ina maioritad da la cumissiun la pussaivladad d'in sconto. En vista ad in project purtabel ed equilibrà ha la cumissiun desistì da far propostas per ulteriuras distgargias fiscalas.
En moda cuntraversa è er vegnida discutada la dumonda, sche questa revisiun parziala da la lescha da taglia stoppia vegnir suttamessa al referendum obligatoric. Ina maioritad da la cumissiun è la finala s'exprimida da suttametter il project al referendum obligatoric.
En la votaziun finala ha la cumissiun approvà la revisiun parziala da la lescha da taglia cun 7 cunter 1 vusch.

Persuna che dat infurmaziuns:
president da la cumissiun Aldo Tuor, tel. 081 920 36 36

Gremi: cumissiun per economia e taxas
Funtauna: rg cumissiun per economia e taxas