Oz è ida a fin a Flem la sessiun d'atun da las chombras federalas. Durant trais emnas han il chantun Grischun, la regiun Surselva e las vischnancas da Flem Laax Falera dastgà esser ospitantas ed ospitants per il parlament federal, per il cussegl federal e per ulteriuras collavuraturas e per ulteriurs collavuraturs da la sessiun. Ils giasts, ch'èn evidentamain cuntents, laschan concluder che la sessiun saja ida bain. Quai prenda la regenza en enconuschientscha cun plaschair e spera che las parlamentarias e ch'ils parlamentaris e che las visitadras e ch'ils visitaders da la sessiun hajan survegnì simpatia per il chantun Grischun er per l'avegnir.
Ch'igl è reussì d'organisar e da realisar la sessiun a plaina cuntentientscha da las participadas e dals participads è cleramain il merit da las organisaziuns partenarias e da numerusas gidantras e da numerus gidanters. Las vischnancas, las regiuns, las organisaziuns turisticas e culturalas, las forzas da segirezza, las appartegnentas ed ils appartegnents da l'armada, las voluntarias ed ils voluntaris e spezialmain er la direcziun e las collavuraturas ed ils collavuraturs dal "Park Hotel Waldhaus" han contribuì essenzialmain al success. Quai vala medemamain per las vischnancas e per las regiuns che han pussibilità in program d'excursiun varià e da buna qualitad. Ad ellas tuttas ed ad els tuts engrazia la regenza cordialmain. In grazia fitg spezial va per finir a las presidentas ed als presidents ed als organs directivs dal parlament federal, a las commembras ed als commembers dal parlament ed als servetschs dal parlament. La collavuraziun da tuts ensemen è stada motivanta e marcada d'allegraivels contacts persunals. A revair a Berna.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun